धोकादायक घरे आणि इमारतींना नोटिसा
| नेरळ | वार्ताहर |
कर्जत नगरपरिषदेने आपली आपत्ती व्यवस्थापन यंत्रणा कार्यान्वित केली आहे. पावसाळ्यात आपत्तीच्या काळात सर्वाधिक धोका असलेली धोकादायक घरे आणि इमारती तसेच दरडीच्या पायथ्याशी असलेली घरांना असलेला धोका लक्षात घेऊन सर्वांना नोटिसा बजावल्या आहेत. शहरातील दरडीच्या छायेत असलेल्या 110 घरांना आणि 22 धोकादायक इमारती यांना त्या नोटिसा बजावल्या असून, सर्वांनी शासनाच्या सूचनांचे पालन करावे, असे आवाहन पालिकेच्या प्रभारी मुख्याधिकारी सुरेखा भणगे यांनी केले आहे.
कर्जत या 1992 मध्ये नगरपालिका म्हणून अस्तित्वात आलेल्या शहरात पूर्वी ग्रामपंचायत होती. ग्रामपंचायत असताना कर्जत शहरात पूर्वी मोठ्या प्रमाणात वाडे होते. तर काही प्रमाणात तीन मजल्याच्या इमारतीदेखील होत्या. आता कर्जत शहरातील अनेक जुने वाडे पाडले जाऊन मोठे टॉवर उभे राहात आहेत. मात्र, आजही शहरात मोठ्या प्रमाणात वाडे असून, त्यातील दुमजली इमारतींचे आयुष्यमान संपले असून, त्यांना कर्जत नगरपालिकेने धोकादायक ठरवले आहे. पालिकेने मागील चार महिने शहरातील सर्व जुन्या इमारती आणि वडे पालिकेने नेमलेल्या पथकाने केली, त्या पथकात शहर अभियंतेदेखील होते.
त्यानंतर अहवाल तयार करण्यात आल्यानंतर कर्जत नगरपालिका हद्दीमधील 22 इमारती आणि वास्तू यांना धोकादायक ठरविण्यात आले आहे.
त्या 22 इमारतीपैकी काही इमारती मध्ये आजही अनेक कुटुंबे राहात असून, त्यांना तात्काळ स्थलांतरण करण्याच्या सूचना देण्यात आल्या आहेत. त्याचवेळी कर्जत पालिकेने धोकादायक ठरविण्यात आलेल्या इमारती यांच्या आजूबाजूला राहणार्या रहिवाशी यांनी आपली काळजी घ्यावी, असे आवाहन पालिकेकडून करण्यात आले आहे. या धोकादायक दरडीखालील घरांमध्ये गुंडगे भागातील 12, मुद्रे येथील 73, भिसेगाव येथील 13 त्याच भागातील सटुआई नगरातील 12 अशा एकूण 110 घरांना, तर शहरातील धोकादायक 22 इमारती यांना पावसाळयात धोकादायक ठरवले आहे.
नोटिसा बजावण्यात आलेल्या सर्वांनी आपली घरे पडण्याच्या स्थितीत असल्यास ती खाली करावीत, सुरक्षित ठिकाणी राहावे आणि आपल्या कुटुंबाची काळजी घ्यावी, अशी सूचना पालिकेने केली आहे.
सुरेखा भणगे, प्रभारी मुख्याधिकारी