द्रविडला विश्रांती, लक्ष्मणच्या हाती संघाची धुरा

बीसीसीआयचा मोठा निर्णय

| नवी दिल्ली | वृत्तसंस्था |

वेस्ट इंडिजनंतर भारतीय संघ टी-20 मालिका खेळण्यासाठी आयर्लंडला जाणार आहे. या दौर्‍यात बहुतांश वरिष्ठ खेळाडूंना विश्रांती दिली जाण्याची शक्यता आहे. याच पार्श्‍वभूमीवर भारताचे मुख्य प्रशिक्षक राहुल द्रविड आणि त्यांच्या सपोर्ट स्टाफला वेस्ट इंडिजविरुद्ध सुरू असलेल्या मालिकेनंतर सुट्टी देण्यात येणार असून, लक्ष्मणकडे संघाच्या मुख्य प्रशिक्षकाची जबाबदारी देण्यात येणार आहे. द्रविड आणि त्याच्या कोचिंग स्टाफमधील इतर सदस्य ऑगस्टमध्ये मायदेशी परततील, जिथे शेवटचे दोन टी-20 खेळले जातील, असे एका इंग्रजी वृत्तवाहिनीने वृत्त दिले आहे. द्रविड व्यतिरिक्त, स्टाफमध्ये फलंदाजी प्रशिक्षक विक्रम राठौर आणि गोलंदाजी प्रशिक्षक पारस म्हांबरे यांचा समावेश आहे. उर्वरित प्रशिक्षक कर्मचार्‍यांचे मुख्य कारण म्हणजे 31 ऑगस्टपासून सुरू होणार्‍या आशिया चषकापूर्वी ताजेतवाने होण्यासाठी पुरेसा वेळ मिळावा, त्यानंतर ऑस्ट्रेलियाविरुद्धच्या तीन सामन्यांच्या वनडे मालिकेसह व्यस्त वेळापत्रक असेल. हे विश्‍वचषकापर्यंत कायम राहणार आहे.

आयर्लंडमध्ये संघाची धुरा सांभाळण्याची जबाबदारी एनसीए प्रमुख व्हीव्हीएस लक्ष्मण यांच्यावर असणार आहे. सितांशु कोटक आणि हृषीकेश कानिटकर यांच्यासोबत ते प्रशिक्षक संघाचे नेतृत्व करण्याची शक्यता आहे, तर ट्रॉय कुली आणि साईराज बहुतुले हे गोलंदाजी प्रशिक्षक आहेत. व्हीव्हीएस लक्ष्मणने यापूर्वी काही टी-20 सामन्यांसाठी गेल्या जूनमध्ये आयर्लंडचा दौरा केला, तेव्हा प्रशिक्षक म्हणून काम पाहिले होते. यावेळी आयर्लंडमध्ये 18, 20 आणि 23 ऑगस्ट रोजी डब्लिन येथे तीन टी-20 आंतरराष्ट्रीय सामने खेळवले जाणार आहेत. आयर्लंड मालिकेसाठी संघ अद्याप निश्‍चित झालेला नसला तरी हार्दिक पांड्या संघाचे नेतृत्व करेल अशी अपेक्षा आहे.