मद्यधुंद डॉक्टरचा पोलीस ठाण्यात धिंगाणा

पेणमध्ये खळबळ; डॉ. संगम पाटील अटकेत

| पेण | प्रतिनिधी |

पेण शहरात कायदा व सुव्यवस्थेला धक्का देणारी धक्कादायक घटना घडली असून, एका डॉक्टरनेच दारूच्या नशेत थेट पोलीस ठाण्यात घुसून गोंधळ घातल्याने खळबळ उडाली आहे. संगम वसंत पाटील (रा. फणस डोंगरी, गोळीबार मैदान) असे या डॉक्टरचे नाव असून, शहरातील चावडी नाका परिसरात त्रिवेणी हेल्थ केअर नावाचे त्याचे क्लिनिक आहे.

मिळालेल्या माहितीनुसार, सत्यजित पाटील हे अपंग व्यक्ती डॉ. पाटील यांच्या विरोधात तक्रार देण्यासाठी पोलीस ठाण्यात आले होते. त्यावेळी त्यांच्या मागोमाग डॉ. पाटील ठाण्यात पोहोचले आणि त्यांनी सत्यजित पाटील यांना धमकावण्यास सुरुवात केली. परिस्थिती नियंत्रणात आणण्यासाठी पोलीस निरीक्षक संदीप बागूल यांनी डॉ. पाटील यांना केबिनमध्ये बोलावून समज देण्याचा प्रयत्न केला. मात्र, दारूच्या नशेत असलेल्या डॉक्टरने जोरजोरात आरडाओरडा व शिवीगाळ सुरू केली.

केबिनबाहेर काढल्यानंतरही त्यांनी पोलीस अंमलदाराशी धक्काबुक्की करत अश्लील शिवीगाळ केली. तसेच “पत्रकारांना बोलावतो, पोलिसांना धंद्याला लावतो” अशा शब्दांत धमकी देत अंमलदार कक्षातच उघडपणे गोंधळ घालत सरकारी कामात अडथळा निर्माण केला. याप्रकरणी पेण पोलीस ठाण्यात गुन्हा दाखल करण्यात आला असून, आरोपी डॉ. संगम वसंत पाटील यांना अटक करण्यात आली आहे. या घटनेमुळे पेण शहरात संतापाची लाट उसळली असून, समाजात जबाबदारीची भूमिका निभावणाऱ्या डॉक्टरकडून अशा प्रकारचे वर्तन अयोग्य असल्याच्या तीव्र प्रतिक्रिया उमटत आहेत. या प्रकरणाचा पुढील तपास पोलीस निरीक्षक संदीप बागूल यांच्या मार्गदर्शनाखाली सुरू आहे.