धक्कादायक! शाळेची फि न भरल्याने विद्यार्थ्यांना बसविले वर्गाबाहेर

पालकांमध्ये तीव्र संतापाचे वातावरण;पून्हा असे प्रकार होणार नसल्याचे शाळा प्रशासनाकडून आश्‍वासन
। उरण । विठ्ठल ममताबादे ।
शाळेची फी न भरल्याने शाळेतील विद्यार्थ्याना अपमानास्पद वागणूक देत तासन्तास वर्गाबाहेर ताटकळत ठेवण्याचा निंदनीय प्रकार उरणमध्ये घडला. या घटनेमुळे पालक वर्गामध्ये तीव्र संतापाचे वातावरण पसरले. उरण शहरात अनेक नामांकित इंग्रजी माध्यम शाळापैकी बोरी येथील यूईएस ही शाळा असून इंग्रजी माध्यमाच्या या शाळेत गरिब श्रीमंत अशा सर्वच स्तरातील विद्यार्थी शिक्षण घेत आहेत. मात्र या शाळेत विद्यार्थ्यांना शाळेची फी भरली नसल्याने वर्गासमोर तासनतास ताटकळत ठेवल्याची धक्कादायक प्रकार गुरुवारी (दि.15) घडला.

नेहमीप्रमाणे विद्यार्थी सकाळी 7 वाजता शाळेत गेले होते. मात्र फी न भरल्याने त्यांना वर्गात न घेता वर्गाबाहेर बसविण्यात आले. सकाळी 7 ते 10:30 वाजेपर्यंत शाळा प्रशासनाचे शिक्षक अथवा प्राचार्य किंवा शाळा व्यवस्थापनाची एकही जबाबदार व्यक्ती तिथे बघायलासुद्धा आले नाहीत. याबाबत पालकांना समजताच त्यांनी शाळेत धाव घेतली व घडलेल्या निंदनीय व बेकायदेशीर प्रकाराबाबत शाळेचे शिक्षक व प्राचार्याना जाब विचारला. त्यावेळी असता विद्यार्थ्यांना वर्गाबाहेर बसविले नसल्याचे प्रा.सिमरन दहिया यांनी सांगितले. पालकांचा संताप पाहून प्राचार्यांनी याबद्दल काहीही माहित नसल्याचे सांगत हात वर केले.

विदयार्थ्यांना सकाळी 7 ते 10:30 या वेळेत वर्गाबाहेर ठेवल्याने पालकांच्या डोळ्यात पाणी आले. संतापात त्यांनी शाळा प्रशासनाला धारेवर धरले. 5 वी ते 10 वर्गात शिकणार्‍या एकूण 18 विद्यार्थ्यांना वर्गाबाहेर बसविण्यात आले. सामाजिक कार्यकर्ते जयंत गांगण यांनी यूईएस शाळा उपाध्यक्ष मिलिंद पाडगावकर यांना माहिती दिली असता ते तातडीने शाळेत आले.तसेच ही घटना निंदनीय असून अशी घटना पुन्हा होणार नसल्याची कबूली उपस्थित पालकांना दिली.

संबंधितांवर कारवाईची मागणी
पालक शिक्षक संघटनेच्या व्हाईस प्रेसिडेंट प्राजक्ता गांगण यांनी पालकांशी अपशब्द वापरणार्‍या व या सर्व घटनेला सर्वस्वी जबाबदार असलेले शिक्षक व प्राचार्य यांना निलंबित करण्याची मागणी केली. फी संदर्भात अशा घटना यू.ई.एस शाळेत वारंवार होत असून अशा घटना पुन्हा होउन नयेत, यासाठी गट शिक्षणाधिकारी, शिक्षणमंत्री यांनी संबंधित शिक्षक व प्राचार्यांवर कारवाई करावी, अशी मागणी पालकांनी केली.

विदयार्थ्याना फी न भरल्याने वर्गाबाहेर ठेवण्यात आले असल्याचे पालकांनी सांगितले. घडलेल्या प्रकाराची कल्पना नाही. या घटनेचे शाळा व्यवस्थापन समर्थन करणार नाही. जे कोणी दोषी असतील त्यांच्यावर कठोर कारवाई करण्यात येईल. फी भरण्यासाठी कोणत्याही पालकांवर, विद्यार्थ्यांवर दबाव टाकलेला नाही. भविष्यात पालक व विदयार्थ्याना कोणताही शारिरीक मानसिक त्रास होणार नाही याची काळजी घेवू.

-मिलिंद पाडगावकर, यूईएस शिक्षण संस्थेचे उपाध्यक्ष

फी भरण्यासाठी पालकांना सवलत दिली आहे. शाळा व्यवस्थापनाकडून शाळेतील विद्यार्थी, पालकांना कोणताही त्रास दिला जात नाही. पालकांना कोणतीही समस्या असल्यास त्यांनी प्रा. सिमरन दहिया किवा व्यवस्थापन समितीच्या सभासदांना संपर्क साधावा. त्यांची समस्या त्वरित सोडविण्यात येईल.

चंद्रकांत ठक्कर, यूईएस शिक्षण संस्थेचे खजिनदार

यू. ई. एस शाळेत प्राचार्य सिमरन दहिया व शिक्षकांकडून नेहमी उडवाउडवीची उत्तर दिली जातात. अन्यायाच्या विरोधात आवाज उठविण्याचा प्रयत्न केला की, त्यांचा आवाज दाबला जातो. फी भरण्यासाठी विद्यार्थी व पालकांवर वेगवेगळ्या पद्धतीने प्रेशर दिले जाते. शाळेत घडलेला प्रकार अशोभनीय व निंदनीय असून प्राचार्य व संबधित शिक्षकांवर कारवाई झालीच पाहीजे.

– प्राजक्ता गांगण, पीटीए व्हॉइस प्रेसिडेंट (पालक शिक्षक संघटना )