आशिया चषकाची घोडदौड अंतिम टप्प्यात

उपांत्य फेरीसाठी चार संघ निश्चित

| नवी दिल्ली | वृत्तसंस्था |

महिला आशिया चषकामध्ये विजेतेपदाच्या शर्यतीत आता केवळ चार संघ उरले आहेत. बांगलादेशने आपल्या गटातील शेवटच्या सामन्यात संयुक्त अरब अमिरातीचा 34 धावांनी पराभव करून उपांत्य फेरीत स्थान निश्चित केले आहे. या निकालामुळे स्पर्धेतील अंतिम चार संघ निश्चित झाले आहेत. भारत, पाकिस्तान आणि श्रीलंका नंतर आता बांगलादेशने उपांत्य फेरीत जागा पक्की केली आहे.

भारत, पाकिस्तान आणि श्रीलंका यांनी याआधीच उपांत्य फेरीतील जागा पक्की केली होती; त्यांना आता बांगलादेशची साथ मिळाली असून, बांगलादेश उपांत्य फेरीत पोहोचणारा चौथा संघ ठरला आहे. या विजयाचे मुख्य श्रेय बांगलादेशच्या गोलंदाजांना जाते, त्यांनी समोर 104 धावांचे लक्ष्य ठेवले आणि संपूर्ण डावादरम्यान प्रतिस्पर्धी फलंदाजांना रोखून धरले. प्रथम फलंदाजी करताना, बांगलादेशला सुरुवातीच्या 6 षटकांत केवळ 21 धावा करता आल्या आणि दोन बळी गमवावे लागले. मात्र, त्यानंतर त्यांनी डाव सावरला. 20 षटकांत 7 बाद 103 धावांपर्यंत मजल मारली. 104 धावांच्या लक्ष्याचा पाठलाग करताना युएईची सुरुवात त्याहूनही खराब झाली. बांगलादेशच्या गोलंदाजांनी पॉवरप्लेमध्येच दोन बळी टिपले. सहा षटकांनंतर युएइची धावसंख्या 2 बाद 15 अशी होती. 10 षटकांच्या समाप्तीपर्यंत संघाला केवळ 34 धावा करता आल्या. बांगलादेशने नियमित अंतराने बळी घेत आणि चा धावांचा वेग रोखून दबाव कायम ठेवला. त्यामुळे युएई संघाला 20 षटकांत 9 बाद केवळ 69 धावा करता आल्या. परिणामी, बांगलादेशने हा सामना 34 धावांनी जिंकला आणि उपांत्य फेरीत प्रवेश केला.

या स्पर्धेत उपांत्य फेरीसाठी पात्र ठरणारा भारत हा पहिला संघ होता. त्यानंतर, श्रीलंका संघाने ‌‘गट ब‌’ मधून अंतिम चारमध्ये स्थान मिळवले. 7 सप्टेंबरच्या रात्री पाकिस्ताननेही उपांत्य फेरीतील आपले स्थान निश्चित केले. आता बांगलादेशच्या विजयानंतर उपांत्य फेरीचे चित्र स्पष्ट झाले आहे. ‌‘गट अ‌’ मध्ये भारत अव्वल स्थानावर राहिला, तर पाकिस्तानने दुसरे स्थान मिळवले. ‌‘गट ब‌’ मध्ये श्रीलंका पहिल्या आणि बांगलादेश दुसऱ्या स्थानावर राहिले. परिणामी, पहिल्या उपांत्य सामन्यात भारताचा सामना आज (दि.10) बांगलादेशशी होणार असून, दुसरा उपांत्य सामना शुक्रवारी (दि.11) श्रीलंका आणि पाकिस्तान यांच्या पार पडणार आहे. हे दोन्ही सामने रात्री 8.00 वाजता (भारतीय प्रमाणवेळेनुसार) सुरू होणार असून, दुबईमध्ये खेळवले जाणार आहेत. तसेच, या स्पर्धेचा अंतिम सामना रविवारी (दि.13)दुबईमध्ये खेळवला जाणार आहे.