रायगड जिल्हा परिषदेच्या आठ शाळा नादुरुस्त

नऊ शाळांमधील 18 वर्गखोल्या धोकादायक

| पनवेल | वार्ताहर |

पनवेलमधील जिल्हा परिषदेच्या आठ शाळा नादुरुस्त आहेत. अडीवली, रोहिंजण, वडघर, वडघर आदिवासी वाडी, दिघाटी, बौदधवाडी, पापडीचा पाडा, केळवणे येथील आठ शाळा नादुरुस्त आहेत. त्यांच्या दुरुस्तीसाठी 52 लाख 65 हजार 67 रुपयांचा प्रस्ताव अलिबाग झेडपीकडून राज्य शासनाकडे पाठवण्यात आला आहे. तर धोकादायक नऊ शाळा असून वर्ग खोल्यांची संख्या 18 आहे.

धोकादायक शाळांमध्ये कामोठे, कन्या शाळा गव्हाण, चिखले, कोळखेपेठ, लोणीवली, दुंदरे, वाकडी, तळोदा पाचनंद उर्दू, सवणे या नऊ शाळांमध्ये 18 वर्ग खोल्या धोकादायक आहेत. यापैकी कामोठे येथील वर्ग खोल्या वापरात नाहीत. कन्या शाळा गव्हाण येथील वर्गखोली पाडण्यात आलेली आहे. चिखले येथील एक खोली वापरात नाही. कोळखेपेठ येथील खोलीचा जागेचा वाद सुरू आहे. लोणीवली येथील दोन खोल्या वापरत नाहीत. दुंदरे येथे या खोल्यांमध्ये अंगणवाडी बांधण्याचा प्रस्ताव करण्यात आला आहे. वाकडी येथील खोली वापरात नाही. तळोजा पाचनंद उर्दू येथील तीन खोल्या वापरात नाहीत आणि सवणे येथील एक खोली वापरात नाही. यातील धोकादायक आणि नादुरुस्त असलेल्या काही शाळा महापालिका हद्दीतील देखील आहेत. धोकादायक वर्ग खोल्या पाडण्यासाठीचा प्रस्ताव अलिबाग येथे पाठवण्यात आले असल्याची माहिती शिक्षण विभाग, पनवेल पंचायत समितीकडून देण्यात आली. नुकत्याच शाळा सुरू झालेल्या आहेत. पनवेल तालुक्यातील जिल्हा परिषदेच्या शाळेमध्ये हजारो विद्यार्थी-विद्यार्थिनी शिक्षण घेत आहेत. काही ठिकाणी शाळा सुस्थितीत आहेत तर काही ठिकाणी गळक्या शाळा आहेत. काही शाळांवर छप्पर टाकण्यात आले आहे. त्यामुळे नादुरुस्त झालेल्या शाळांसाठीचा निधी लवकरात लवकर मंजूर होणे गरजेचे आहे. निधी मंजूर झाल्यास शाळा दुरुस्ती करणे सोपे होईल.

नादुरुस्त शाळांसाठी जिल्हा नियोजनमधून मंजुरी प्राप्त आहे. तसेच युडायस प्रणालीमार्फत शासनाकडे तरतुदीची मागणी केलेली आहे. धोकादायक शाळांमध्ये विद्यार्थ्यांना बसवत नाहीत इतरत्र त्यांची व्यवस्था करण्यात आलेली आहे. तसेच या धोकादायक शाळा पाडण्याची प्रक्रिया सुरू आहे.

अभिजीत मटकर,
कनिष्ठ अभियंता