| रायगड | जिल्हा प्रतिनिधी
अलिबाग नगरपरिषदेच्या निवडणुकीनंतर नगराध्यक्षपदाची सूत्रे अक्षया नाईक यांनी स्वीकारली असून, उपनगराध्यक्षपदाची जबाबदारी ॲड. मानसी म्हात्रे यांच्याकडे सोपविण्यात आली आहे. त्यानंतर आता नगरपरिषदेतील विविध विषय समित्यांच्या सभापती व सदस्यांची निवड पूर्ण करण्यात आली आहे.
शुक्रवारी (दि. 23) अलिबाग नगरपरिषदेच्या सभागृहात झालेल्या विशेष बैठकीत स्थायी समितीची स्थापना करण्यात आली. यासोबतच शहराच्या सर्वांगीण विकासाच्या दृष्टीने चार प्रमुख विषय समित्यांची रचना करण्यात आली आहे.
स्थायी समितीच्या पदसिद्ध सभापतीपदी नगराध्यक्षा अक्षया नाईक आणि उपनगराध्यक्षा ॲड. मानसी म्हात्रे यांची निवड करण्यात आली आहे. तर, स्थायी समितीचे सभापती म्हणून प्रशांत नाईक, अनिल चोपडा आणि डॉ. साक्षी पाटील यांची निवड झाली आहे. तसेच प्रदीप नाईक व समीर ठाकूर यांची नामनिर्देशित सदस्य म्हणून निवड करण्यात आली आहे.
स्वच्छता, वैद्यक व सार्वजनिक आरोग्य समितीच्या सभापतीपदी उपनगराध्यक्षा ॲड. मानसी म्हात्रे यांची निवड करण्यात आली असून, या समितीवर शैला भगत, ॲड. ऋषिकेश माळी आणि जमालउद्दीन सय्यद हे सदस्य आहेत. वीज व सार्वजनिक बांधकाम समितीच्या सभापतीपदी प्रशांत नाईक यांची निवड करण्यात आली असून, ॲड. नीलम हजारे, आनंद पाटील व योजना पाटील हे सदस्य असतील. पाणीपुरवठा व जलनिस्सारण समितीच्या सभापतीपदी अनिल चोपडा यांची निवड झाली असून, वृषाली भगत, संतोष गुरव आणि सागर भगत यांची सदस्य म्हणून निवड करण्यात आली आहे. महिला व बालकल्याण समितीच्या सभापतीपदी डॉ. साक्षी पाटील तर उपसभापतीपदी ॲड. अश्विनी ठोसर यांची निवड करण्यात आली आहे. या समितीवर संध्या पालवणकर व ॲड. निवेदिता वाघमारे या सदस्य असतील. या समित्यांच्या माध्यमातून अलिबाग शहराच्या विकासाला गती मिळेल, असा विश्वास नगरपरिषद प्रशासनाने व्यक्त केला आहे.