एसटीत 400 खासगी कंत्राटी चालकांची नियुक्ती

मुंबई | प्रतिनिधी |
कर्मचार्‍यांच्या संपामुळे ठप्प असलेली एसटी सुरळीत करण्यासाठी खासगी कंत्राटी चालकांची नियुक्ती एसटीचे चालक म्हणून केली जाणार आहे. त्यानुसार रविवारपासून टप्प्याटप्यात राज्यातील एसटीच्या आठ विभागांत 400 खासगी चालक नियुक्त होत असल्याची माहिती एसटी महामंडळाने दिली. सुमारे तीन हजारांपर्यंत कंत्राटी चालक भरती करण्याचा विचार महामंडळाचा आहे.
विलीनीकरणाच्या मागणीसाठी गेल्या दोन महिन्यांपासून सुरू असलेला संप अद्यापही मिटलेला नाही. त्यामुळे प्रवाशांचे हाल होत असून ग्रामीण भागातील प्रवाशांना खासगी प्रवासी वाहतुकीवरच अवलंबून राहावे लागत आहे.
महामंडळाने एसटी सुरळीत करण्यासाठी खासगी कंत्राटी चालकांना नियुक्त करण्याचा निर्णय घेतला. हे मनुष्यबळ पुरवणार्‍या कंत्राटदारांकडून अर्जही मागविले. त्यानुसार महामंडळाकडे अर्ज प्राप्त झाल्यानंतर चार कंत्राटदारांना राज्यातील एसटीच्या आठ विभागांत चालक पुरवण्याचे कामही सोपविले आहे. नागपूर, भंडारा, धुळे, जळगाव, नाशिक, ओैरंगाबाद, पुणे, सोलापूर या आठ विभागांत 400 खासगी चालक नियुक्त केले जातील, अशी माहिती देण्यात आली. 9 जानेवारीपासूनच हे चालक नियुक्त करावे, अशा सूचना एसटी महामंडळाकडून कंत्राटदारांना करण्यात आल्या आहेत.
पुरवठा करण्यासाठी खासगी संस्थांनाही अटी व शर्ती घातल्या आहेत. भरती केले जाणारे मनुष्यबळ हे चालक करार पद्धतीने आहेत. अवजड वाहन चालवण्याचा परवाना घेऊन किमान एक वर्ष पूर्ण असणे, अवजड वाहन अथवा प्रवासी वाहतुकीचा अनुवभ आवश्यक असणे यासह अन्य काही अटी नमूद आहे.

सेवानिवृत्त आणि स्वेच्छानिवृत्त चालकांनाही एसटी महामडंळाकडे चालक करार पद्धतीने अर्ज करण्यास सांगण्यात आले आहेत. त्यासाठीही तीन दिवसांची मुदत देण्यात आली होती. आतापर्यंत 285 अर्ज महामंडळाकडे प्राप्त झाले आहेत सेवानिवृत्त चालकांना एसटीत करारपद्धतीने 20 हजार रुपयांपर्यंत मासिक वेतन मिळणार आहे.
शेखर चन्ने, व्यवस्थापकीय संचालक, एसटी महामंडळ