दृष्टी नसली तरी जिद्दीचा प्रकाश

दृष्टीहीन विद्यार्थ्यांचे टायपिंग परीक्षेत उज्वल यश

| माणगाव | प्रतिनिधी |

शारीरिक अडचणी कितीही मोठ्या असल्या तरी जिद्द, चिकाटी आणि कष्ट यांच्या जोरावर यश मिळवता येते, याचे जिवंत उदाहरण माणगाव येथील दोन दृष्टीहीन विद्यार्थ्यांनी दाखवून दिले आहे. उज्वला टायपिंग संस्था, माणगाव येथील विद्यार्थ्यांनी GCC-TBC महाराष्ट्र राज्य परीक्षा परिषद, पुणे यांच्या जानेवारी 2026 मध्ये झालेल्या इंग्रजी व मराठी टायपिंग परीक्षेत उल्लेखनीय यश संपादन करत सर्वांचे लक्ष वेधून घेतले आहे. या परीक्षेचा निकाल 10 मार्च रोजी जाहीर झाला.

या यशामध्ये सर्वात भावनिक आणि प्रेरणादायी बाब म्हणजे धृव महाडिक आणि हर्ष महाडिक हे दोन्ही विद्यार्थी 100 टक्के दृष्टीहीन असूनही त्यांनी अत्यंत परिश्रमाने टायपिंगचे कौशल्य आत्मसात करून उत्कृष्ट गुण मिळवले. मराठी टायपिंग विषयात धृव विलास महाडिक याने 89.5 गुण मिळवत प्रथम क्रमांक पटकावला, तर इंग्रजी व मराठी 30 गतीच्या परीक्षेतही त्यांनी उल्लेखनीय यश मिळवले. त्यांच्या या यशामुळे परिसरात आनंदाचे वातावरण निर्माण झाले असून अनेकांसाठी ते प्रेरणेचे स्रोत ठरले आहेत.

अंधारमय आयुष्यातही ज्ञानाचा प्रकाश शोधत त्यांनी केलेला हा प्रवास खरोखरच प्रेरणादायी आहे. दृष्टी नसतानाही की-बोर्डवरील प्रत्येक अक्षर ओळखत त्यांनी टायपिंगचे प्रशिक्षण घेतले. यासाठी त्यांना दररोज मोठ्या चिकाटीने सराव करावा लागला. त्यांच्या पालकांनीही मुलांच्या शिक्षणासाठी अथक परिश्रम घेतले आणि रोज वर्गाला सोडणे-आणणे, सरावासाठी प्रोत्साहन देणे अशा प्रकारे त्यांना सतत पाठबळ दिले.

आजच्या स्पर्धेच्या युगात अनेक सुविधा उपलब्ध असूनही काही विद्यार्थी हार मानतात; मात्र दृष्टी नसतानाही मोठी स्वप्ने पाहून ती पूर्ण करण्यासाठी झटणाऱ्या या विद्यार्थ्यांनी समाजाला जिद्द आणि धैर्याचा संदेश दिला आहे. त्यांच्या या यशामुळे माणगाव परिसरात अभिमानाची भावना निर्माण झाली असून अनेक विद्यार्थ्यांना पुढे जाण्याची प्रेरणा मिळाली आहे.

कर्तृत्व सिद्ध
दृष्टी नसली तरी मनातला प्रकाश कायम तेजस्वी ठेवत मेहनत आणि आत्मविश्वास असेल तर कोणतेही स्वप्न अशक्य नसते हे या विद्यार्थ्यांनी आपल्या कर्तृत्वातून सिद्ध करून दाखवले आहे.