डोळ्यांची साथ रोखण्यासाठी विद्यार्थ्यांची तपासणी

जिल्हा शल्यचिकित्सक डॉ. आंबादास देवमाने

| रायगड | खास प्रतिनीधी |

जिल्ह्यातील काही भागांमध्ये डोळे येण्याची विषाणुजन्य साथ वाढत आहे. शाळेतील विद्यार्थ्यांमध्ये हे प्रमाण अधिक असल्याचे दिसत आहे. अ‍ॅडिनो वायरस मुळे डोळे येण्याचा आजार होतो. हा आजार ससंर्गजन्य असल्याने आवश्यक काळजी घेणे गरजेचे आहे. याचा अधिक फैलाव होऊ नये यासाठी शाळांमध्ये जाऊन विद्यार्थ्यांची तपासणी करण्याची मोहिम आखण्यात येत असल्याची माहिती जिल्हा शल्य चिकित्सक डॉ. आंबादास देवमाने यांनी कृषीवलशी बोलताना दिली. राज्यातील शहरातील अनेक रुग्णालयातील वार्डात सध्या डोळ्याची साथ आलेल्या रुग्णांची संख्या वाढताना पाहायला मिळत आहे. विशेष म्हणजे डोळ्याची साथ आल्यास नागरिकांनी स्टेरॉईड आईज् ड्रॉपचा वापर टाळावा असे आवाहन आरोग्य विभागाने केले आहे. तर डोळ्यांचा त्रास होत असल्यास तत्काळ रुग्णालयात जाऊन उपचार करणे गरजेचे आहे.

अलिबाग हे शहर महानगरांना लागून असलेले शहर आहे. त्यामुळे या ठिकाणी सातत्याने नागिकांची ये-जा सुरु असते. त्यामुळे डोळ्याचा संसर्ग वाढण्यात मदत होत आहे. याचा सर्वाधिक त्रास सध्या शाळेतील विद्यार्थ्यांना होत असल्याचे समोर आले आहे. शहरातील शाळांमधील विद्यार्थ्यांना डोळे येण्याचे प्रमाण आता वाढत असल्याचे दिसत आहे. त्यामुळे पालक मात्र चांगलेच चिंतातुर झाले आहेत. काहीच दिवसांपूर्वी शाळेतील चाचणी परिक्षा संपल्या आहेत. पेपर चुकू नये यासाठी ज्या विद्यार्थ्यांना डोळे आले होते ते शाळेत गेेले होते. त्याचा संसर्ग आता वाढल्याचे बोलले जाते. साथीच फैलाव होऊ नये यासाठी ती रोखण्यासाठी प्रयत्न सुरु करण्यात आले आहेत. ज्या शाळांमध्ये डोळे येण्याचे प्रमाण अधिक आहे. तेथे तज्ञ डॉक्टरांचे पथक पाठवण्यात येणार आहे. संबंधीत डॉक्टर अशा शाळेत जाऊन त्या शाळेतील विद्यार्थ्यांच्या डोळ्याची तपासणी करणार आहेत. त्याबाबतचे नियोजन सुरु असून पुढील दोन-तीन दिवसांमध्ये प्रत्यक्ष कार्यवाही करण्यात येणार असल्याकडे डॉ. दवमाने यांनी लक्ष वेधले.

स्टेरॉईडचा वापर टाळा
संसर्ग किंवा ऍलर्जीमुळे डोळे लाल होणे आणि सूज येणे यावर उपचार करण्यासाठी स्टेरॉईड याचा वापर केला जातो. शरीरात जळजळ करणारे पदार्थ बाहेर पडण्यास प्रतिबंध करून ते लालसरपणा, खाज सुटणे यासह वेदना कमी करण्यासाठी याचा वापर केला जातो. तर डोळ्यांच्या आजारासाठी अनेकजण याचा वापर करतात. मात्र, नागरिकांनी स्टेरॉईडचा वापर करू नयेत असे आवाहन आरोग्य विभागाने केले आहे. कारण दीर्घकाळ वापरल्याने याचे डोळ्यावर परिणाम होण्याची शक्यता असते.

डोळे येण्याची लक्षणे
डोळे लाल होणे, वारंवार पाणी गळणे, सुज येणे, चिकट द्रवपदार्थ बाहेरील बाजुस येतो, खाज येणे, डोळे जड वाटतात व डोळयात काहीतरी गेल्यासारखे वाटते अशी काळजी घ्या. डोळ्याला स्वच्छ पाण्याने सतत धुणे, इतर व्यक्तीचा रुमाल, टॉवेल, कपडे इत्यादीने डोळे पुसु नये, सतत स्पर्श करु नये, घराबाहेर जाताना गॉगल वापरा, नेत्रतज्ञाचा सल्ला घ्यावा, परिसर स्वच्छ ठेवावा, वसतीगृहे, अनाथालय अशा संस्थात्मक ठिकाणी जर अशी साथ आली असेल तर डोळे आलेल्या मुलाला किंवा व्यक्तीला वेगळे ठेवण्याची गरज आहे. डोळे येणे हा संसर्गजन्य रोग असल्यामुळे एकापासून दुसर्‍या व्यक्तीला वेगाने संसर्ग होतो, त्यामुळे नियमीत हात धुवावेत डॉक्टाराच्या सल्ल्यानुसारच औषधी डोळयात टाकावी डोळे आल्यानंतर स्टेरॉईड आय ड्रॉपचा वापर टाळावा.