शुल्लक वादातून कुटुंबावर प्राणघातक हल्ला; तरुणाचा मृत्यू

तिघांना अटक

। छत्रपती संभाजीनगर । प्रतिनिधी ।

छत्रपती संभाजीनगरमधील संभाजी कॉलनी एन-6 परिसरात एक धक्कादायक प्रकार घडला आहे. घराच्या बांधकामासाठी टाकलेल्या खडीवरून वाद घालत एका कुटुंबावर चाकू, दगडाने प्राणघातक हल्ला करण्यात आला. या हल्ल्यात एका तरुणाचा मृत्यू झाला. तर तीन जण जखमी झाले असून त्यांच्यावर एका खासगी रुग्णालयात उपचार सुरु आहेत.

संभाजी कॉलनीत रमेश जगन्नाथ पाडसवान (60) हे पत्नी मंदाबाई, मुलगा प्रमोद, सून रोशनी व नातू रुद्राक्ष यांच्यासह राहतात. त्यांच्या घराचे काम सुरू असल्याने त्यांनी घरासमोरील मोकळ्या जागेवर बांधकामासाठी खडी टाकली आहे. या खडीवरून त्यांच्या शेजारी राहणारे काशिनाथ निमोने, मुलगा ज्ञानेश्वर निमोने, गौरव निमोने, सौरव निमोने, काशिनाथ निमोने याची पत्नी शशिकला व जावई मनोज दानवे यांनी दुपारच्या सुमारास पाडसवान यांच्या घरासमोर जाऊन त्यांना खडीवरून शिवीगाळ सुरू केली. त्यामुळे पाडसवान कुटुंब घराबाहेर आले. त्यांनी शिवीगाळ का करता? अशी विचारणा केली असता काशिनाथ निमोने यांनी रमेश पाडसवान यांना धक्काबुकी केली. त्यानंतर मुलगा प्रमोद व नातू भांडण सोडविण्यासाठी आले असताना निमोने, गौरव निमोने, ज्ञानेश्वर मनोज दानवे, सौरव निमोने यांनी प्रमोद पाडसवान यास मारहाण करत चाकूने त्याच्या पाठीवर वार केले. त्यामुळे प्रमोद रक्ताच्या थारोळ्यात पडताच जीव वाचविण्याच्या उद्देशान असताना सौरव निमोने, काशिनाथ निमोने व मनोज दानवे यांनी पकडून मारहाण करून पत्नी शशिकला निमोनेकडून चाकू घेऊन सौरव याने कंबरेवर वार केला. वडील व आजोबाला वाचविण्यासाठी धावून येणाऱ्या रुद्राक्षला पकडून मारहाण करत त्यालादेखील चाकूने भोसकले. पती, मुलगा व नातू रक्ताच्या थारोळ्यात पडलेले पाहून हंबरडा फोडत आलेल्या मंदाबाईला हल्लेखोरांनी देखील सोडले नाही. या घटनेनंतर हल्लेखोरांनी तेथून पळ काढला. स्थानिकांनी जखमींना तात्काळ एमजीएम रुग्णालयात दाखल केले. मात्र, गंभीर जखमी झालेल्या प्रमोद पाडसवानचा उपचारादरम्यान मृत्यू झाला. तर इतर तीन जणांवर रुग्णालयात उपचार सुरू आहेत.

याप्रकरणी हल्ला करणाऱ्या सहा जणांविरुद्ध सिडको पोलीस ठाण्यात गुन्हा दाखल करण्यात आला आहे. तर आरोपी सौरभनिमोने, आणि त्याचे वडील काशिनाथ निमोणे, जावई मनोज दानवे यांना पोलिसांनी ताब्यात घेतले आहे. तसेच, या घटनेचा अधिक तपास पोलीस करीत आहेत.