लॉजिस्टीक पार्कविरोधात शेतकरी आक्रमक

प्रकल्पासाठी जमीन न देण्यावर ठाम
सिडकोची बोलती बंद
उरण | वार्ताहर |
उरण तालुक्यात सिडकोमार्फत राबविण्यात येत असलेल्या लॉजिस्टिक पार्कच्या जमीन संपादन प्रकियेबाबत शेतकर्‍यांमध्ये मोठी नाराजी पसरली होती. त्या पार्श्‍वभूमीवर दि. 18 ऑगस्ट रोजी लॉजिस्टीक पार्कच्या भूसंपादनासंदर्भात सिडकोची शेतकरी आणि ग्रामस्थ यांच्यामध्ये जनसुनावणीची बैठक धुतुम येथे ग्रामपंचायत कार्यालयात झाली. बैठकीचे आयोजन धुतुम ग्रामपंचायतीच्या वतीने सरपंच रेश्मा ठाकूर व सदस्यांनी केले होते. सिडकोकडून भूसंपादन विभागाचे सतीशकुमार खडके आणि प्रमदा बिडवे आणि इतर अधिकरी सरपंच, सदस्य आणि मोठ्या संख्येने शेतकरी, ग्रामस्थ उपस्थित होते.
प्रकल्पग्रस्त शेतकरी आणि ग्रामस्थांनी कोणताही गोंधळ न घालता अत्यंत मुद्देसूद प्रश्‍न विचारून अक्षरशः सिडकोचे खडके आणि अधिकार्‍यांना भांडावून सोडले. त्यांची बोलतीच बंद केली. सर्वप्रथम साडेबावीस टक्के पॅकेजला कडाडून विरोध केला आणि जमीनच न देण्याचा इशारा प्रकल्पग्रस्त शेतकर्‍यांनी सिडकोला दिला. शेवटपर्यंत शेतकर्‍यांनी लॉजिस्टीक पार्कला जमीनच न देण्याचा निर्णय सांगून टाकला. त्यामुळे शेवटी सतीशकुमार खडके यांना रिकाम्या हाताने परत जावे लागले.
या जनसुनावणीस सरपंच रेश्मा ठाकूर, सदस्य शरद ठाकूर, सदानंद ठाकूर, वैशाली पाटील, माजी सरपंच शंकर ठाकूर, डी.आर. ठाकूर, दत्तू ठाकूर, लक्ष्मण ठाकूर, सदानंद ठाकूर, धनाजी ठाकूर, संदेश ठाकूर, अ‍ॅड. चंद्रकांत मढवी, विशाल पाटील, नंदेश ठाकूर, संतोष पाटील, चंदन ठाकूर आणि मोठ्या संख्येने तरुण, ग्रामस्थ, शेतकरी उपस्थित होते.प्रास्तविक आणि आभार प्रदर्शन ग्रामपंचायत सदस्य शरद ठाकूर यांनी केले.