सप्तश्रृंगी गड घाटात बसचा भीषण अपघात; एका महिलेचा मृत्यू

। नाशिक । वृत्तसंस्था ।

नाशिकच्या सप्तश्रृंगी गड घाटात बसला अपघात झाला असून अपघातात एका महिलेचा मृत्यू झाला आहे. बस सप्तशृंगी गडावरून खामगावच्या दिशेनं निघाली होती. त्यावेळी घाटातील गणपती टप्प्यावरुन बस थेट ४०० फूट खोल दरीत कोसळली असून एका महिलेचा मृत्यू झाला आहे.

अपघातग्रस्त बस (MH-40-AQ-6259) खामगाव आगाराची असून सप्तशृंगी गड ते खामगाव (बुलढाणा) असा बसचा प्रवास सुरू झाला होता. बुधवारी (दि.१२) गड उतरत असताना गणपती टप्प्यावरून बस खाली कोसळली असून तब्बल 400 फूट ती गेली आहे. तर बसमधून प्रवास करणारे २२ जण जखमी झाले आहेत. तसेच, या बस अपघातात एका महिलेचा मृत्यू झाला आहे. यावेळी, चालक गजानन टपके, वाहक पुरुषोत्तम टिकार कर्तव्यावर होते. या अपघातात चालक गंभीर जखमी झाला आहे, असे खामगाव आगार सहाय्यक कर्मचारी पवार यांनी सांगितले आहे.

सकाळी साडेसहा वाजता बस स्टॉपवरून निघालो. पण दहा बारा मिनीटानंतर गणपती पाँइट येथे धुकं भयानक होतं. त्या धुक्यामुळं वळण चालकाच्या लक्षात आलं नसावं असं वाटतं.

पुरुषोत्तम टिकार, वाहक

दरम्यान, अपघाताची माहिती मिळताच नाशिकचे पालकमंत्री दादा भुसे अपघातस्थळी दाखल झाले. सप्तश्रृंगी गडावरील स्थानिक रहिवाशी आणि शासकीय यंत्रणांकडून मदतकार्य सुरू झाले. सर्व जखमींना वणी ग्रामीण रुग्णालयात उपचारासाठी दाखल करण्यात आलं आहे.

सप्तश्रृंगी घाटात एसटी बस अपघात झाला आहे. त्याची माहिती घेतली असून संबंधित यंत्रणेला सर्वोतपरी मदतीच्या सूचना दिल्या आहेत. बस अपघातातील जखमींना जवळच्या शासकीय रुग्णालयात उपचारासाठी दाखल केलं आहे. अपघात ग्रस्तांची कुठलीही गैरसोय होणार नाही. यासंबंधी यंत्रणेला सूचना दिल्या असून मी स्वतः संपर्कात आहे. सर्व परिस्थितीवर लक्ष ठेवून आहे.

दादा भुसे, पालक मंत्री

तसेच, या एसटी बसच्या अपघातात मृत्यूमुखी पडलेल्या महिलेच्या वारसाला दहा लाख रुपयांची मदत एसटी महामंडळामार्फत देण्यात येणार असल्याचे जाहीर करण्यात आले असून, या अपघातातील जखमींवर शासकीय खर्चाने उपचार करण्यात येणार असल्याचेही मुख्यमंत्री एकनाथ शिंदे यांनी सांगितले आहे.