लाडकी बहीण योजनेतून नावे वगळली
ई-केवायसी, वयोमर्यादा व अन्य योजनांचा लाभ ठरला अपात्रतेचा आधार
| रायगड | जिल्हा प्रतिनिधी |
विधानसभा निवडणुकीपूर्वी महिलांच्या आर्थिक सक्षमीकरणासाठी मोठ्या गाजावाजात सुरू करण्यात आलेल्या मुख्यमंत्री माझी लाडकी बहीण योजनेतून रायगड जिल्ह्यातील तब्बल 50 हजार महिलांना अपात्र ठरविण्यात आले आहे. ई-केवायसी अपूर्ण राहणे, अन्य शासकीय योजनांचा लाभ सुरू असणे, वयोमर्यादा ओलांडणे तसेच इतर निकषांमध्ये न बसल्यामुळे या महिलांची नावे लाभार्थी यादीतून वगळण्यात आली आहेत. त्यामुळे जिल्ह्यातील हजारो महिलांना मोठा धक्का बसला असून, या निर्णयाची जोरदार चर्चा सुरू झाली आहे.
महिला व बालविकास विभागामार्फत महिलांना आर्थिकदृष्ट्या सक्षम करण्याच्या उद्देशाने 2024 मध्ये मुख्यमंत्री माझी लाडकी बहीण योजना सुरू करण्यात आली होती. या योजनेंतर्गत पात्र महिलांना दरमहा 1,500 रुपयांचे आर्थिक सहाय्य देण्यात येत असून, रायगड जिल्ह्यात सुरुवातीला 6 लाख 25 हजार महिला पात्र ठरल्या होत्या.
दरम्यान, लाभार्थ्यांच्या पात्रतेची खातरजमा करण्यासाठी शासनाने ई-केवायसी आणि कागदपत्र पडताळणी मोहीम हाती घेतली. त्यानुसार जिल्ह्यातील 63 हजार 782 महिलांच्या कागदपत्रांची पडताळणी करण्यात आली. यामध्ये अनेक लाभार्थ्यांची ई-केवायसी अपूर्ण किंवा तांत्रिकदृष्ट्या चुकीची असल्याचे निदर्शनास आल्यानंतर मार्च महिन्यात 22 हजार 375 महिलांची पुन्हा पडताळणी करण्यात आली.
वर्षभर चाललेल्या या तपासणीत काही लाभार्थी नमो शेतकरी, संजय गांधी निराधार यांसारख्या अन्य शासकीय योजनांचा लाभ घेत असल्याचे आढळून आले. तसेच अनेक महिलांनी ई-केवायसी पूर्ण केली नव्हती, तर काही जणी वयोमर्यादेपेक्षा अधिक असल्याने योजनेच्या निकषात बसल्या नाहीत.
या सर्व पडताळणीनंतर रायगड जिल्ह्यातील सुमारे 50 हजार महिलांना अपात्र घोषित करण्यात आले असून, सध्या 5 लाख 76 हजार महिलांनाच मुख्यमंत्री माझी लाडकी बहीण योजनेचा लाभ दिला जात असल्याची माहिती महिला व बालविकास विभागाकडून देण्यात आली आहे. या निर्णयामुळे लाभापासून वंचित राहिलेल्या महिलांमध्ये नाराजीचे वातावरण निर्माण झाले आहे.
रायगडातील लाडकी बहीण योजनेची स्थिती
सुरुवातीचे पात्र लाभार्थी : 6,25,000
पडताळणी झालेली प्रकरणे : 63,782
पुनर्पडताळणी : 22,375
अपात्र ठरलेल्या महिला : सुमारे 50,000
सध्या लाभ घेणाऱ्या महिला : 5,76,000