फायरमनभरती रखडली; निवड समितीच्या बैठकीला मुहूर्त कधी?

। पुणे । प्रतिनिधी ।

पिंपरी-चिंचवड महापालिकेच्या अग्निशमन विभागासाठी फायरमन रेस्क्युअरच्या 150 जागांसाठी घेण्यात आलेल्या ऑनलाइन परीक्षेला सात, तर मैदानी परीक्षेला दोन महिने होऊन गेल्यानंतरही फायरमनची भरती होत नसल्याचे चित्र आहे. निवड समितीच्या बैठकीला अद्यापि मुहूर्त मिळत नसल्यामुळे फायरमनच्या अंतिम यादीला उशीर होत आहे. त्यामुळे उमेदवारांची घालमेल सुरू झाली आहे.

पिंपरी-चिंचवड शहर आणि परिसरात मागील काही वर्षांपासून आगीच्या सातत्याने घटना घडत आहेत. अशा घटना घडल्यानंतर तत्काळ आग विझविण्यासाठी महापालिकेच्या अग्निशमन दलाचे जवान सदैव तत्पर असतात. मात्र, शहरात वाढणार्‍या मालमत्ता आणि लोकसंख्येमुळे सद्यःस्थितीत अग्निशमन दलाकडे असणार्‍या अधिकारी-कर्मचार्‍यांची संख्या कमी पडत आहे. याचाच विचार करून महापालिका प्रशासनाने गतवर्षी अग्निशमन विभागासाठी 150 फायरमनची भरतीप्रक्रिया राबविली.

फायरमनच्या 150 जागांसाठी एक हजार 500 अर्ज महापालिकेच्या सामान्य प्रशासन विभागास प्राप्त झाले होते. या परीक्षार्थीची 29 ऑगस्ट 2024मध्ये पुणे शहरातील नऊ केंद्रांवर ऑनलाइन परीक्षा घेण्यात आली. या परीक्षेत 895 उमेदवार उत्तीर्ण झाले. त्या उमेदवारांची शारीरिक क्षमता चाचणी घेण्यास उशीर होत असल्याने नाराजी व्यक्त करण्यात येत होती. विधानसभा निवडणुकीच्या आचारसंहितेमुळे, तसेच पिंपरी-चिंचवड पोलीस आयुक्तालयाने चाचणी घेण्यास नकार दिल्याने ही परीक्षा रखडली होती. याविरोधात माध्यमांनी आवाज उठविल्यानंतर साडेचार महिन्यांनंतर 22 ते 24 जानेवारी 2025 या तीन दिवसांच्या कालावधीत भोसरी येथील संत ज्ञानेश्‍वर क्रीडा संकुलात 100 गुणांची शारीरिक क्षमता मैदानी चाचणी सिन्थेटिक मैदानावर घेण्यात आली.

फायरमन भरतीसाठी संदर्भात निवड समितीची लवकरच बैठक घेण्यात येणार आहे. बैठक झाल्यानंतर चार दिवसांत पात्र उमेदवारांची अंतिम यादी महापालिकेच्या संकेतस्थळावर प्रसिद्ध केली जाईल. त्यानंतर तत्काळ पात्र उमेदवारांना अग्निशमन विभागात रुजू करून घेतले जाईल.

– विठ्ठल जोशी, उपायुक्त, सामान्य प्रशासन विभाग