माजी मुख्यमंत्री बुद्धदेव भट्टाचार्य यांचे निधन

| नवी दिल्ली | वृत्तसंस्था |

पश्‍चिम बंगालचे माजी मुख्यमंत्री आणि सीपीएम नेते बुद्धदेव भट्टाचार्य यांचे गुरुवारी (दि.8) सकाळी त्यांच्या दक्षिण कोलकाता येथील निवासस्थानी निधन झाले. त्यांनी वयाच्या 80 व्या वर्षी अखेरचा श्‍वास घेतला.

गेल्या काही दिवसांपासून त्यांची तब्येत ठीक नव्हती. त्यांना श्‍वासोच्छ्वासाचा त्रास जाणवत होता. यामुळे त्यांना वारंवार रुग्णालयात दाखल करावे लागत होते. गेल्या वर्षी त्यांना न्युमोनिया झाल्याने लाईफ सपोर्टवर ठेवावे लागले होते. त्यातून ते बरे झाले होते. पण, गुरुवारी त्यांची प्राणज्योत मालवली. त्यांच्या पश्‍चात पत्नी मीरा आणि मुलगा सुचेतन असा परिवार आहे.

भट्टाचार्य हे सीपीएमच्या सर्वोच्च निर्णय घेणार्‍या पॉलिटब्युरोचे माजी सदस्य होते. त्यांनी 2000 ते 2011 पर्यंत बंगालचे मुख्यमंत्री म्हणून काम केले. ज्योती बसू यांच्यानंतर भट्टाचार्य मुख्यमंत्रीपदावर विराजमान झाले. पण ममता बॅनर्जी यांच्या नेतृत्वाखालील तृणमूल काँग्रेसने ऐतिहासिक विजय मिळवून पश्‍चिम बंगालमधील 34 वर्षांची कम्युनिस्ट राजवट संपुष्टात आणली. 2011 च्या विधानसभा निवडणुकीत भट्टाचार्य यांनी सीपीएमचे नेतृत्व केले. ते कोलकाता येथील प्रेसिडेन्सी कॉलेजचे माजी विद्यार्थी होते. भट्टाचार्य पूर्णवेळ राजकारणात येण्यापूर्वी पेशाने शिक्षक होते. आमदार आणि राज्यमंत्री म्हणून काम केल्यानंतर बसू 2000 मध्ये पायउतार होण्याआधी त्यांना उपमुख्यमंत्री बनवण्यात आले. तसेच त्यांच्या नेतृत्त्वात 2001 आणि 2006 मध्ये सीपीएमला विधानसभा निवडणुकीत विजय मिळाला होता.