भीषण! ट्रॅव्हल्स-पिकअपच्या धडकेत चार जणांचा मृत्यू

। नाशिक । प्रतिनिधी ।

मालेगाव-मनमाड राज्य महामार्गावर सोमवारी (दि.19) पहाटे भीषण अपघात घडला. मालेगाव तालुक्यातील वऱ्हाणे गावाजवळ खाजगी ट्रॅव्हल्स आणि पिकअप वाहनाची समोरासमोर जोरदार धडक झाली. या भीषण अपघातात चार जणांचा मृत्यू झाला. तर दोघेजण गंभीर जखमी झाले असून 20 हून अधिक प्रवासी किरकोळ जखमी झाले आहेत.

पुण्याकडून मालेगावकडे एक खाजगी ट्रॅव्हल्स प्रवाशांना घेऊन जात होती. दरम्यान वऱ्हाणे गावाजवळील एका वळणावर समोरुन येणाऱ्या पिकअप वाहनाची आणि ट्रॅव्हल्सची जोरदार धडक झाली. धडकेची तीव्रता इतकी मोठी होती की, पिकअप वाहन थेट ट्रॅव्हल्समध्ये घुसले आणि बसच्या पुढील भागाचं मोठ्या प्रमाणावर नुकसान झाले. स्थानिकांकडून घटनेची माहिती मिळताच मालेगाव तालुका पोलिसांनी रुग्णवाहिकेसह घटनास्थळी धाव घेत जखमींना बाहेर काढले. या अपघातात पिकअपमधील चार जणांचा जागीच मृत्यू झाला. तसेच ट्रॅव्हल्समधील 20 हून अधिक प्रवासी जखमी झाले आहेत. अपघातातील 2 गंभीर जखमींना तातडीने खासगी रुग्णालयात हलवण्यात आले आहे. तर इतर जखमींवर मालेगावच्या सामान्य रुग्णालयात दाखल करण्यात आले.