बागायतदारांसाठी महावितरणकडून चारपट वसुली

आ. निकम आक्रमक; अजित पवारांकडे मांडली कैफिय

| चिपळूण । वार्ताहर ।

कोकणातील बागायतदार शेतकर्‍यांना महावितरणचा वेगळा दर लावून चारपट वसुली केली जात आहे. उर्वरित महाराष्ट्रावर महावितरण मेहरबान आहे. त्यांना वेगळा दर लावण्याचे काम करण्यात आले आहे. रत्नागिरी जिल्ह्यातील बागायतदार शेतकर्‍यांकडून वाढीव वीजबिल वसुली करणार्‍या महावितरणविरोधात आमदार शेखर निकम यांनी आक्रमक भूमिका घेतली. अधिवेशनाच्या पूर्वसंध्येला राज्याचे विरोधीपक्ष नेते अजित पवार यांची भेट घेऊन कैफियत मांडली आहे.

जिल्ह्यात आंबा, काजू, नारळ, सुपारी, चिकू आदी फळपिके कोकणात घेतली जात आहेत. त्यांना पाणी पुरवठा करण्यासाठी शेतकर्‍यांनी महावितरणकडून एजी अंतर्गत पंप कनेक्शन घेतली आहेत. मुळात संपूर्ण महाराष्ट्रात फळपिके घेतली जात आहे. त्या बागायतींना महावितरणकडून पाण्यासाठी वीज कनेक्शन देण्यात आली आहेत. वीज कनेक्शन आणि वीज दर हा महाराष्ट्रामध्ये एकच असताना रत्नागिरी जिल्ह्यासाठी या दरात बदल आहे. चारपट दराने लाखो रुपये महावितरण विभागाने वसूल केले असल्याचे आमदार शेखर निकम यांनी समोर आणले आहे. जो न्याय जिल्ह्यातील शेतकऱ्यांना तोच उर्वरित महाराष्ट्रातील शेतकर्‍यांना असला पाहिजे, अन्यथा उर्वरित महाराष्ट्रातील शेतकर्‍यांना लावलेला दर लावा, अशी मागणी आमदार निकम यांनी केली आहे.

नागपूर येथे अधिवेशनाच्या पूर्वसंध्येला अजित पवार यांची भेट घेऊन महावितरणच्या कारभार समोर ठेवला. अजित पवार यांनी थेट महावितरणचे एमडी विजय सिंघाल यांना जाब विचारत हा प्रकार काय असा सवाल करीत धारेवर धरले.