पाण्याच्या टाकीत गुदमरून चार कामगारांचा मृत्यू

। मुंबई । प्रतिनिधी ।

नागपाडामध्ये इमारतीच्या बेसमेंटमधील पाण्याची टाकी स्वच्छ करण्यासाठी उतरलेल्या पाच कामगारांपैकी चौघा जणांचा विषारी वायूमुळे गुदमरून मृत्यू झाला असून एकावर रुग्णालयात उपचार सुरू आहेत. ही दुर्घटना रविवारी (दि. 09) दुपारी घडली. दरम्यान, या दुर्घटनेचा प्राथमिक अहवाल प्राप्त झाल्यानंतर दोषींवर कारवाई करण्यात येईल, असे महापालिका प्रशासनाच्यावतीने सांगण्यात आले आहे.

नागपाडा येथील मिंट रोड गुड लक मोटर ट्रेनिंग स्कूलजवळ बिस्मिल्लाह स्पेस या 20 मजली इमारतीचे बांधकाम सुरू आहे. इमारतीच्या बेसमेंटमध्ये पाण्याची टाकी असून ती स्वच्छ करण्यासाठी एक कामगार रविवारी दुपारी 12.15 च्या सुमाराला टाकीत उतरला. मात्र, बराच वेळ तो बाहेर न आल्याने इतर चार कामगार टाकीत अडकलेल्या कामगाराला बाहेर काढण्यासाठी इतर चौघेही आत उतरले. मात्र, टाकीतील विषारी वायूमुळे कामगारांना त्रास झाला आणि ते बेशुद्ध पडले. बराच वेळ झाल्याने कामगार न परतल्यामुळे काही जण टाकीजवळ आले असता हा प्रकार उघडकीला आला.

या दुर्घटनेची माहिती मिळताच अग्निशमन दलाचे जवान तात्काळ घटनास्थळी दाखल झाले आणि त्यांनी मदतकार्य हाती घेतले. त्याचबरोबर, रुग्णवाहिका, पोलीस आणि संबंधित पालिका विभाग कार्यालयातील कर्मचार्‍यांनीही दुर्घटनास्थळी धाव घेतली. अग्निशमन दलाच्या जवानांनी पाच कामगारांना बाहेर काढले आणि उपचारासाठी नजीकच्या जे. जे रुग्णालयात दाखल केले. मात्र, या घटनेत चार कामगारांचा मृत्यू झाला. हसीबुल शेख (19), राजा शेख (20), जिउल्ला शेख (36), इमांदू शेख (38) अशी मृत कामगारांची नावे आहेत. त्यातील पुरहान शेख (31) हा वाचला असून त्याच्यावर जे. जे. रुग्णालयात उपचार सुरू आहेत.