डॉलरच्या प्रलोभनातून दोन लाखांची फसवणूक

| पनवेल | वार्ताहर |

सायन येथे राहणाऱ्या कपड्याच्या व्यावसायिकाला कमी किमतीत अमेरिकन डॉलर देण्याच्या प्रलोभनातून दोन लाखांची रोख रक्कम उकळल्याचा प्रकार घडला आहे. याप्रकरणी एपीएमसी पोलिसांनी दोघांविरोधात गुन्हा दाखल केला आहे.

सायन येथे कपडे विक्रीचे दुकान असलेले तनवीर अहमद (20) यांच्या दुकानावर मोहम्मद नावाचा एक व्यक्ती गेला होता. त्यावेळी दहा हजारांचे कपडे खरेदी केले होते. त्यानंतर मोहम्मद आणि तनवीर यांची चांगली ओळख झाली होती. याचाच फायदा उचलत मोहम्मद याने सात हजार अमेरिकन डॉलर बदली करायचे आहेत, असे सांगितले. त्यानुसार तनवीरने अडीच हजार अमेरिकन डॉलर खरेदी करण्याची तयारी दर्शवली होती. त्यानुसार कोपरी गावात मोहम्मदने एका पिशवीमधून आणलेले डॉलरचे बंडल तनवीरला दाखवले. त्यामुळे तनवीरने दोन लाखांची रक्कम मोहम्मदला दिली. त्यानंतर मोहम्मदसोबत असलेल्या व्यक्तीने डॉलर असल्याचे भासवून रूमालात बांधलेल्या नोटा तनवीरला दिल्या होत्या. मात्र, काही वेळानंतर तनवीरने रूमालात बांधलेल्या नोटांची तपासणी केली असता, त्यात डॉलरऐवजी कागदी बंडल असल्याचे आढळून आले. त्यामुळे फसवणूक झाल्याचे लक्षात आल्यानंतर एपीएमसी पोलिस ठाण्यात तक्रार दाखल केली.