अध्यक्ष, अॅड. गौतम पाटील यांनी जनता शिक्षण मंडळातर्फे केले आभार व्यक्त
| अलिबाग | विशेष प्रतिनिधी |
रायगड जिल्हयाचे खासदार व जे.एस.एम. कॉलेजचे माजी विद्यार्थी खासदार सुनिल तटकरे यांच्या खासदार फंडातून जे. एस. एम. कॉलेजला रु. २५ लाखाचा विकास निधी मंजूर करण्यात आला आहे
दि. ३० एप्रिल २०२२ रोजी झालेल्या जे. एस. एम. कॉलेजच्या माजी विद्यार्थी स्नेहमेळाव्यात महाविद्यालयाचे माजी विद्यार्थी म्हणून खासदार सुनिल तटकरे आवर्जून उपस्थित राहिले होते. या वेळी कॉलेजच्या विकासासाठी रू. २५ लाखाचा निधी देत असल्याची घोषणा त्यांनी केली होती. त्याची पूर्तता त्यांनी हा विकास निधी उपलब्ध करून केली आहे. या संबंधीचे पत्र खासदार सुनिल तटकरे यांचेकडून जनता शिक्षण मंडळाचे अध्यक्ष अॅड. गौतम पाटील यांना प्राप्त झाले आहे.
महाविद्यालयाने सादर केलेल्या प्रस्तावानुसार कॉलेज आवारात सिमेंट पदपथ व इतर कामांसाठी रु. १५. लाख व विद्यार्थी सुविधा केंद्र, बाॅईज कॉमन रूम, गर्ल्स कॉमन रूम, एन. एस. एस. व कल्चरल रूम नूतनीकरणासाठी रू. १० लाखांचा निधी मंजूर करण्यात आला आहे. महाविद्यालाच्या विकासास व विशेषतः विद्यार्थ्यांच्या विविध सहशैक्षणिक व इतर कार्यक्रमांसाठी हा निधी उपलब्ध झाला असल्याने विद्यार्थी व शिक्षक वर्गाने आनंद व्यक्त केला आहे.
खासदार सुनिल तटकरे यांनी अत्यंत कमी कालावधीत एक माजी विद्यार्थी म्हणून अत्यंत त्वरेने हा निधी उपलब्ध करून दिल्याचे महाविद्यालयाचे प्राचार्य डॉ. अनिल पाटील यांनी सांगितले.
महाविद्यालायात सुरू करण्यात आलेली विकासाची कामे व विद्यार्थी केंद्रीत सुविधा उपलब्ध करून देण्यासाठी खासदार सुनिल तटकरे यांनी दिलेल्या विकास निधीचा खूप मोठा हातभार लागणार आहे असे प्रतिपादन जनता शिक्षण मंडळाचे अध्यक्ष, अॅड. गौतम पाटील यांनी केले असून जनता शिक्षण मंडळ व संचालक मंडळाच्या वतीने खासदार सुनिल तटकरे यांचे आभार मानले आहेत. कार्यकारी अभियंता, सा. बा. विभाग, अलिबाग यांच्यामार्फत सदर कामे पूर्ण करण्यात येतील अशी माहिती अध्यक्षांनी दिली.