उद्या सी.डी. देशमुख नाट्यगृहाच्या नूतनीकरण
। रोहा । जितेंद्र जोशी ।
रोहा शहरात उभारण्यात येत असलेल्या डॉ. चिंतामणराव देशमुख शहर सभागृहाच्या दि. 27 फेब्रुवारीच्या भूमीपूजन कार्यक्रमाच्या निमंत्रण पत्रिकेवर राज्याचे मुख्यमंत्री उद्धव ठाकरे यांचा फोटोदेखील छापण्यात आलेला नसल्याने निधी राज्य शासनाचा की राष्ट्रवादी काँग्रेस पक्षाचा, असा प्रश्न उपस्थित केला जात आहे. यावरुन शिवसेनेकडून नाराजी व्यक्त केली जात असून, राज्य सरकारचा निधी असताना राष्ट्रवादी या कामाचे श्रेय घेत असल्याचा आरोप शिवसेनेकडून केला जात आहे. रायगड जिल्ह्याच्या पालकमंत्री अदिती तटकरे व रायगडचे खा. सुनिल तटकरे विकासकामांचे श्रेय राष्ट्रवादी काँग्रेसकडे घेण्यासाठी शिवसेना आमदारांना डावलत असल्याने पालकमंत्री हटाव भूमिका सेनेच्या तिन्ही आमदारांनी अलिबाग येथे झालेल्या पक्षाच्या जिल्हा मेळाव्यात घेतली होती. हे प्रकरण ताजे असतानाच रोहा येथील भुमीपूजन कार्यक्रम निमंत्रण पत्रिकेतून खुद्द मुख्यमंत्री महोदयांचे नाव आणि फोटो वगळण्याचे धारिष्ट्य राष्ट्रवादी काँग्रेसच्या वतीने करण्यात आल्याने सेना आमदारांच्या मोहिमेला आपण काडीची किंमत देत नसल्याचे पालकमंत्री महोदयांनी कृतीतून दाखवून दिले आहे.
रोह्यात नव्याने उभारण्यात येत असलेल्या शहर सभागृहाच्या जागेची खातेफोड करण्यात आली आहे का? संबंधित कामासाठी रोहा नगरपरिषदेकडे सात कोटी रुपये वर्ग करण्यात आले आहेत. पण, कामाची वर्क ऑर्डर आहे का? जुन्या शहर सभागृहावर दुरुस्तीच्या नावाखाली लाखो रुपयांचा निधी यापूर्वी खर्च करण्यात आला. मात्र, सभागृहाच्या माध्यमातून किती उत्पन्न मिळाले? सदर जागा नगरपालिकेच्या मालकीची आहे का? असे अनेक प्रश्न रोह्यातील प्रसिद्ध राम मारुती चौकात लावण्यात आलेल्या फलकाच्या माध्यमातून उपस्थित करण्यात आले आहेत. यामुळे डॉ. चिंतामणराव देशमुख शहर सभागृहाच्या भूमीपूजन कार्यक्रमात पालकमंत्री अदिती तटकरे व राज्याचे उपमुख्यमंत्री अजित पवार, रायगडचे खा. सुनील तटकरे काय बोलतात, याकडे सर्वांचे लक्ष लागले आहे. राज्यातील आमदारांना त्यांच्या मतदारसंघात विकासकामांसाठी निधी मिळत नसल्याची ओरड आहे. जिल्ह्यातील ठेकेदारांना त्यांच्या केलेल्या कामांची बिले मिळत नसल्याची देखील बोंब आहे. रोहा शहरात मात्र कोटींचा विकासनिधी कामांसाठी सहज उपलब्ध होत असल्याने आगामी न.प. निवडणुकीत रोहा नगरपालिकेवर पुन्हा एकदा राष्ट्रवादी काँग्रेसचाच झेंडा फडकणार असे बोलले जात आहे.
या कार्यक्रमास राज्याचे उपमुख्यमंत्री अजित पवार, पालकमंत्री आदिती तटकरे, खा. सुनिल तटकरे, आ. अनिकेत तटकरे, जिल्हाधिकारी डॉ. महेंद्र कल्याणकर, पोलिस अधिक्षक अशोक दुधे, जिल्हा परिषदेचे मुख्य कार्यकारी अधिकारी किरण पाटील उपस्थित राहणार आहेत. या कार्यक्रमाच्या निमित्ताने रोहा शहरात स्वागत फलक व कमानी उभारण्यात येत असून या स्वागत फलकांवर आणि कमानींवरदेखील निधी राज्य सरकारचा असूनही मुख्यमंत्री उद्धव ठाकरे यांचे छायाचित्र दिसून येत नसल्याची बाब प्रकर्षाने दिसून येत आहे. रायगड जिल्ह्यातील शिवसेना आमदार उपमुख्यमंत्री अजित पवार यांची रोहा येथे भेट घेऊन पालकमंत्री आदिती तटकरे यांच्याकडून निर्णय प्रक्रियेत सातत्याने डावलले जात असल्याबद्दल दाद मागणार का? असादेखील सवाल विचारला जात आहे.