पनवेल रेल्वे स्थानक परिसरातून गांजा जप्त; दोघांना अटक

। पनवेल । प्रतिनिधी ।

पनवेल शहर पोलिसांनी अंमली पदार्थांविरोधातील कारवाईत मोठे यश मिळवत 18 किलो 800 ग्रॅम वजनाचा गांजा जप्त केला असून, दोन आरोपींना अटक केली आहे. जप्त केलेल्या गांजाची अंदाजे किंमत 2 लाख 22 हजार 80 रुपये इतकी आहे.

पोलिसांनी दिलेल्या माहितीनुसार, गुरुवारी (दि. 2 ) पहाटे दोन वाजण्याच्या सुमारास पनवेल रेल्वे स्थानकाच्या परिसरात संशयास्पद हालचाली करणाऱ्या दोघांची तपासणी करण्यात आली. त्यांच्याकडील पिशव्यांची झडती घेतली असता त्यामध्ये गांजा आढळून आला. पोलिसांनी तत्काळ दोघांना ताब्यात घेतले. या कारवाईत आरोपींकडून विविध पिशव्यांमध्ये ठेवलेला 18 किलो 800 ग्रॅम गांजा, तसेच वाहतुकीसाठी वापरण्यात आलेल्या साहित्यांसह मुद्देमाल जप्त करण्यात आला. एकूण जप्त मालाची किंमत 2,22,080 रुपये असल्याचे पोलिसांनी सांगितले. या प्रकरणी पनवेल शहर पोलीस ठाण्यात दाखल करण्यात आला आहे. सदर कारवाई पनवेल शहर पोलीस ठाण्याचे वपोनि बाळा कुंभार यांच्या मार्गदर्शनाखाली पोउपनि दत्तात्रेय देवकते त्यांच्या पथकाने केली आहे. आरोपींकडून अंमली पदार्थांचा पुरवठा कुठून केला जात होता आणि त्यामागे आणखी कोणाचे जाळे कार्यरत आहे का, याचा शोध पोलीस घेत आहेत.