। अलिबाग । विशेष प्रतिनिधी ।
बारावी परिक्षेचा निकाल बुधवारी ऑनलाईन जाहिर करण्यात आला त्यात रायगड जिल्ह्यातील 93.11 टक्के विद्यार्थी उत्तीर्ण झाले. मुंबई विभागात रायगड जिल्ह्याने बाजी मारली आहे. मुंबई विभागात 90.91 टक्के विद्यार्थी उत्तीर्ण झाले. निकालात मुलांच्या तुलनेत मुलींनी बाजी मारली आहे. मुलींचे उत्तीर्ण होण्याचे प्रमाण 94.72 टक्के तर मुलांचे उत्तीर्ण होण्याचे प्रमाण 91.65 टक्के इतके आहे.
महाराष्ट्र राज्य माध्यमिक व उच्च माध्यमिक मंडळातर्फे मार्च, एप्रिल 2022 मध्ये इयत्ता बारावीची परिक्षा घेण्यात आली होती. या परिक्षेचा निकाल बुधवारी मंडळाच्या संकेतस्थळांवर दुपारी 1 वाजता जाहीर करण्यात आला. बारावीच्या परिक्षेसाठी रायगड जिल्ह्यातून 31 हजार 335 विद्यार्थ्यांनी अर्ज भरले होते. त्यापैकी 31 हजार 106 विद्यार्थी परिक्षेला सामोरे गेले. यामधील 28 हजार 964 विद्यार्थी उत्तीर्ण झाले असून, 2 हजार 142 विद्यार्थी अनुत्तीर्ण झाले आहेत. विद्यार्थ्यांच्या उत्तीर्ण होण्याचे प्रमाण 93.11 टक्के इतके आहे. जिल्ह्यात सर्वात जास्त निकाल 98.21 टक्के सुधागड तालुक्याचा लागला असून, सर्वात कमी 71.85 टक्के निकाल पोलादपूर तालुक्याचा लागला आहे.
मागील वर्षाच्या तुलनेत 6.70 टक्क्यांनी बारावी परिक्षेत उत्तीर्ण विद्यार्थ्यांच्या प्रमाणात घट झाली आहे. मागील वर्षी जिल्ह्यातील 99.81 टक्के विद्यार्थी उत्तीर्ण झाले होते. तर चालू वर्षात 93.11 टक्के विद्यार्थी उत्तीर्ण झाले आहेत. रायगड जिल्ह्यातील 1 हजार 39 पुर्नपरिक्षार्थी विद्यार्थ्यांनी परिक्षेसाठी अर्ज दाखल केले होते. यामधील 1 हजार 34 विद्यार्थी परिक्षेला सामेरे गेले. त्यापैकी 505 विद्यार्थी उत्तीर्ण झाले असून, 529 विद्यार्थी अनुत्तीर्ण झाले आहेत. पुर्नपरिक्षार्थी उत्तीर्ण होण्याचे प्रमाण 48.83 टक्के इतके आहे.
विभागात रायगडची बाजी
बारावी परीक्षेत मुंबई विभागाचा निकाल 90.91 टक्के लागला असून, मुंबई विभागात उत्तीर्ण होणार्‍या विद्यार्थ्यांमध्ये रायगड जिल्ह्याने बाजी मारली आहे. जिल्ह्यातील 93.11 टक्के विद्यार्थी उत्तीर्ण झाले असून, ठाणे 92.67, पालघर 91.77, मुंबई (जनरल) 86.60, मुंबई (सब.1) 89.33, मुंबई (सब.2) 91.00 विद्यार्थी उत्तीर्ण झाले आहेत.
तालुकावार निकालाची टक्केवारी
तालुका – टक्के
पनवेल – 97.47
उरण – 92.59
कर्जत – 89.65
खालापूर – 77.74
सुधागड – 98.21
पेण – 94.47
अलिबाग – 96.53
मुरुड – 74.56
रोहा – 91.70
माणगाव – 95.09
तळा – 95.33
श्रीवर्धन – 95.41
म्हसळा – 98.10
महाड – 90.87
पोलादपूर – 71.85