मुलींच्या वसतिगृहाला आग; एकाचा मृत्यू

। पुणे । वृत्तसंस्था ।

पुण्यात एका चार मजली इमारतीला भीषण आग लागल्याची घटना घडली आहे. या आगीत जीव गुदमरून एका व्यक्तीचा मृत्यू झाला आहे. तर इमारतीत अडकलेल्या 48 मुलींची सुखरूप सुटका करण्यात आली आहे.

पुण्यातील कुमठेकर रस्त्यावर असलेल्या एका इमारतीत खाजगी शैक्षणिक संस्था आहे. याच इमारतीत इन्स्टिट्यूटमध्ये शिक्षण घेणाऱ्या मुलींची राहण्याची व्यवस्थासुद्धा करण्यात आली असून या इमारतीत 48 मुली राहत होत्या. गुरूवारी (दि. 6) मध्यरात्री एक वाजण्याच्या सुमारास या इमारतीला भीषण आग लागली. तळमजल्यावर आग लागल्याने तिथे राहत असलेल्या मुलींनी घाबरून टेरेसवर धाव घेतली. आगीची माहिती मिळताच अग्निशमन दलाचे जवान घटनास्थळी हजर झाले आणि काही वेळातच आग विझवण्यात त्यांना यश आले. तसेच, आग लागली त्यावेळी अग्निशमन दलाच्या जवानांनी सर्व मुलींना शेजारील इमारतीवरून शिडीच्या सहाय्याने बाहेर काढण्यात आले. मात्र, तिथे काम करत असलेल्या सागर कुलकर्णी या तरूणाचा आगीत गुदमरून मृत्यू झाला. ही आग कशामुळे लागली असावी हे अद्याप समजू शकलेले नाही.