वेदांत नागवेकरची सुवर्णमय कामगिरी

प्रतिनिधित्व करताना अफाट ताकदीचे प्रदर्शन; 465 किलो वजन उचलून पटकावला प्रथम क्रमांक

| मुंबई | प्रतिनिधी |

श्रीवर्धन तालुक्यातील दिघी येथील रहिवासी आणि सध्या मुंबईतील चांदिवली येथे वास्तव्यास असलेल्या वेदांत नागवेकर या 17 वर्षीय युवा पॉवरलिफ्टरने राज्यस्तरीय पॉवरलिफ्टिंग चॅम्पियनशिप स्पर्धेत ऐतिहासिक कामगिरी नोंदवली आहे. आपल्या जबरदस्त ताकदीच्या जोरावर त्याने सुवर्णपदकासह स्पर्धेतील सर्वोच्च असा “स्ट्राँगमन ऑफ महाराष्ट्र” हा प्रतिष्ठेचा बहुमान पटकावला असून, रायगड जिल्ह्यासह क्रीडा विश्वात त्याचे नाव गाजत आहे.

नेरूळ येथील जुहू नगरमधील गणेश मंदिर हॉल येथे दि.2 ते 4 ऑक्टोबर दरम्यान महाराष्ट्र स्टेट पॉवरलिफ्टिंग असोसिएशन आणि नवी मुंबई पॉवरलिफ्टर्स असोसिएशन यांच्या संयुक्त विद्यमाने महाराष्ट्र स्टेट पॉवरलिफ्टिंग चॅम्पियनशिप अँड सिंगल इव्हेंट बेंचप्रेस व डेडलिफ्ट कॉम्पिटिशनचे आयोजन करण्यात आले होते. ही स्पर्धा आगामी राष्ट्रीय स्पर्धेसाठी अधिकृत निवड चाचणी म्हणून घेण्यात आली होती. या राज्यस्तरीय स्पर्धेत वेदांत नागवेकरने 66 किलो सब-ज्युनिअर गटात नवी मुंबईचे प्रतिनिधित्व करताना अफाट ताकदीचे प्रदर्शन केले आहे. त्याने स्कॉट्स 175 किलो, 80 किलो आणि 210 किलो असे एकूण तब्बल 465 किलो वजन यशस्वीरीत्या उचलून त्याने प्रथम क्रमांक पटकावला आहे. याशिवाय सिंगल इव्हेंट डेडलिफ्ट स्पर्धेतही त्याने 210 किलो वजन उचलून सुवर्ण कामगिरी नोंदवली आहे. या अष्टपैलू व विक्रमी प्रदर्शनामुळे त्याला मान्यवरांच्या हस्ते “स्ट्राँगमन ऑफ महाराष्ट्र” हा बहुमान देऊन गौरविण्यात आले.

वेदांत नागवेकरच्या यशाची ही मालिका सातत्यपूर्ण राहिली आहे. यापूर्वी दि.4 व 5 जुलै रोजी मुंबईतील पवई येथील हिरानंदानी गार्डन्स महाराष्ट्र पॉवरलिफ्टिंग असोसिएशनच्या माध्यमातून पार पडलेल्या राष्ट्रीय स्तरावरील पात्रता स्पर्धेतही त्याने उल्लेखनीय कामगिरी केली होती. त्या स्पर्धेत अवघ्या 17 वर्षीय वेदांतने 67.5 किलो सब-ज्युनिअर गटात सहभाग घेऊन स्क्वॅटमध्ये 175 किलो, बेंचप्रेसमध्ये 75 किलो आणि डेडलिफ्टमध्ये 200 किलो असे एकूण 450 किलो वजन उचलत उत्कृष्ट प्रदर्शन केले होते. राष्ट्रीय स्तरावरील या स्पर्धेत देशभरातील अव्वल खेळाडूंमध्ये त्याने आपले वेगळे स्थान निर्माण केले होते.