पोलीस ठाण्यासाठी शासन दरबारी पाठपुरावा

पोलीस आयुक्त बिपीनकुमार सिंग यांची माहिती

| पनवेल | वार्ताहर |

नव्याने होत असलेला विमानतळ त्याचप्रमाणे पनवेल शहर पोलीस ठाण्याच्या जागेचा प्रश्‍न सोडवण्यासाठी शासन दरबारी पाठपुरावा सुरु असल्याची माहिती नवी मुंबईचे पोलीस आयुक्त बिपीनकुमार सिंग यांनी पनवेल येथे दिली. नवी मुंबई पोलीस आयुक्तालय अंतर्गत परिमंडळ 2 मधील मुद्देमाल हस्तांतरण आणि आयएसओ मानांकन प्रमाणपत्र वितरण सोहळ्यादरम्यान ते बोलत होते.

यावेळी बिपीनकुमार सिंग यांनी सांगितले की, विमानतळासह पनवेलच्या शहर पोलीस ठाण्याच्या जागेचा प्रश्‍न सोडवण्यासाठी शासनदरबारी पाठपुरावा सुरु असून, यासंदर्भात सिडकोने नवीन विमानतळ परिसराचा आराखाडा प्रसिद्ध केला आहे. त्यामध्ये प्रस्तावित पोलीस ठाणेसुद्धा आहे. विमानतळ बनण्यास अजून अवकाश असल्याने त्या जागेसंदर्भातसुद्धा आम्ही शासनदरबारी पाठपुरावा करीत आहोत. नवी मुंबईमध्ये सिडकोने काही ठिकाणी पोलीस ठाणे उभारणीसाठी जागा दिल्या आहेत, तरीपण अजून 2 ते 3 पोलीस ठाण्यांच्या जागेचा प्रश्‍न प्रलंबित आहे, त्यासंदर्भात शासनाकडे पाठपुरावा सुरु आहे. त्यामध्ये प्रामुख्याने पनवेल शहर पोलीस ठाण्याच्या स्वतःच्या जागेचा प्रश्‍न निकाली काढण्यासाठी आम्ही लक्ष घातले असल्याची माहिती पोलीस आयुक्त बिपीनकुमार सिंग यांनी दिली आहे.