नागावच्या सुरक्षित पर्यटनासाठी ग्रामपंचायत अन्‌‍ पोलीस एकत्र

पोलीस निरीक्षक प्रविण पांडे यांचे आश्वासक मार्गदर्शन
सरपंच हर्षदा मयेकर यांचा पुढाकार

| नागाव | प्रतिनिधी |

नागावमधील पर्यटन व्यवसाय अधिक सुरक्षित, शिस्तबद्ध व कायदेशीर चौकटीत राहावा, या उद्देशाने सरपंच हर्षदा मयेकर यांच्या पुढाकारातून ग्रामपंचायत नागाव व अलिबाग पोलीस प्रशासन यांच्या संयुक्त विद्यमाने पर्यटन व्यवसायिकांची महत्त्वपूर्ण बैठक नागाव ग्रामपंचायत सभागृहात उत्साहात पार पडली.
या बैठकीला नागाव हद्दीतील हॉटेल, लॉज, होमस्टे, रिसॉर्ट, वॉटर स्पोर्ट्स तसेच समुद्रकिनारी पर्यटनाशी संबंधित व्यवसायिकांनी मोठ्या संख्येने उपस्थिती दर्शविली.

बैठकीच्या प्रारंभी नागावचे माजी सरपंच नंदकुमार मयेकर यांच्या हस्ते अलिबाग पोलीस ठाण्याचे पोलीस निरीक्षक प्रविण पांडे यांचे पुष्पगुच्छ देऊन स्वागत करण्यात आले. यानंतर पोलीस निरीक्षक प्रविण पांडे यांनी पर्यटन व्यवसाय करताना कायद्याच्या चौकटीत राहण्याचे महत्त्व, पर्यटकांच्या सुरक्षिततेसाठी घ्यावयाची काळजी, शासनाच्या नवीन नियमावली, आवश्यक परवानग्या, नोंदी व कायदेशीर जबाबदाऱ्या याबाबत सविस्तर मार्गदर्शन केले.

पर्यटन व्यवसाय करताना नियमांचे काटेकोर पालन करून नागावची पर्यटनस्थळ म्हणून असलेली विश्वासार्हता अधिक वृद्धिंगत करण्याचे आवाहन त्यांनी केले.
बैठकीदरम्यान उपस्थित व्यावसायिक व ग्रामस्थांनी विविध प्रश्न, अडचणी आणि शंका मांडल्या. त्या सर्व प्रश्नांना पोलीस निरीक्षक प्रविण पांडे यांनी अत्यंत संयमाने व समाधानकारक उत्तरे देत उपस्थितांचे समाधान केले.

यावेळी त्यांनी नागावमध्ये येत्या महिनाभरात पोलीस चौकी सुरू करण्यासाठी आवश्यक कार्यवाही सुरू असून ती लवकरच कार्यान्वित करण्यात येईल, असे आश्वासन दिले. या घोषणेचे उपस्थितांनी टाळ्यांच्या कडकडाटात स्वागत केले. या बैठकीस सरपंच हर्षदा मयेकर, उपसरपंच मंगल नागे, सदस्य निखिल मयेकर, ग्रामपंचायत सदस्य, ग्रामविकास अधिकारी, पोलीस पाटील, पोलीस अधिकारी, सर्कल अधिकारी तसेच नागावमधील पर्यटन व्यवसायिक मोठ्या संख्येने उपस्थित होते.

बैठकीच्या शेवटी सरपंच हर्षदा मयेकर यांनी पोलीस प्रशासन, उपस्थित सर्व व्यावसायिक आणि ग्रामस्थांचे आभार मानत, ग्रामपंचायत व पोलीस प्रशासन यांच्या समन्वयातून नागावला अधिक सुरक्षित, शिस्तबद्ध आणि आदर्श पर्यटनस्थळ बनविण्यासाठी सर्वांनी प्रशासनाला सहकार्य करण्याचे आवाहन केले.