रायगडात ग्रामपंचायतींच्या ऑक्टोबरमध्ये निवडणुका?

24 जुलैला प्रारूप मतदार याद्या; 15 एप्रिलची विधानसभा मतदार यादी ग्राह्य

| रायगड | प्रतिनिधी |

राज्यातील तब्बल 15 हजार 300 ग्रामपंचायतींसह रायगड जिल्ह्यातील 335 ग्रामपंचायतींच्या निवडणुकांची तयारी अंतिम टप्प्यात पोहोचली आहे. राज्य निवडणूक आयोगाने या निवडणुकांसाठी 15 एप्रिल 2026 रोजीची विधानसभा मतदार यादी ग्राह्य धरण्याचा निर्णय घेतला असून, 24 जुलै रोजी प्रभागनिहाय प्रारूप मतदार याद्या प्रसिद्ध केल्या जाणार आहेत. हरकती व सूचना निकाली काढल्यानंतर 4 ऑगस्टला अंतिम मतदार यादी जाहीर होणार असून, ऑक्टोबरमध्ये ग्रामपंचायत निवडणुकांचा बिगुल वाजण्याची दाट शक्यता आहे.

2024, 2025 आणि 2026 मध्ये मुदत संपलेल्या तसेच नव्याने स्थापन झालेल्या ग्रामपंचायतींच्या निवडणुकीची प्रक्रिया आता वेगाने सुरू झाली आहे. राज्य निवडणूक आयोगाने निवडणुकीसाठी 15 एप्रिल 2026 रोजीची विधानसभा मतदार यादी आधार मानण्याचा निर्णय घेतला आहे. त्यामुळे राज्यातील 15 हजार 300 आणि रायगड जिल्ह्यातील 335 ग्रामपंचायतींच्या निवडणुकांची तयारी प्रशासनाने सुरू केली आहे.

महाआयटीने विकसित केलेल्या संगणकीय प्रणालीद्वारे प्रभागनिहाय प्रारूप व अंतिम मतदार याद्या तयार करण्यात येणार आहेत. त्यासाठी https://mahasecvoterlist.in ही लिंक राज्य निवडणूक आयोगाने दिली आहे. त्यासाठी जिल्हाधिकारी कार्यालयांना युजर आयडी व पासवर्ड उपलब्ध करून देण्यात आले असून, तालुकास्तरावर ग्रामपंचायतनिहाय माहिती भरून मतदार याद्या तयार करण्याचे काम सुरू आहे. दरम्यान, काही जिल्ह्यांकडून विशेष सखोल मतदार यादी पुनरावलोकन (एसआयआर) प्रक्रिया पूर्ण झाल्यानंतरच निवडणुका घेण्याची मागणी करण्यात आली होती. मात्र, वेळेत निवडणुका घेण्यासाठी आयोगाने 15 एप्रिल 2026 रोजीची विधानसभा मतदार यादी ग्राह्य धरण्याचा निर्णय घेतला आहे. प्रशासनाच्या अनुभवावरून अंतिम मतदार यादी प्रसिद्ध झाल्यानंतर काही दिवसांतच निवडणूक कार्यक्रम जाहीर केला जातो. पावसाची परिस्थिती लक्षात घेता प्रत्यक्ष मतदान ऑक्टोबर ते डिसेंबरदरम्यान होण्याची शक्यता व्यक्त केली जात आहे.

अशी तयार होणार मतदार यादी
राज्य निवडणूक आयोगाच्या कार्यक्रमानुसार 24 जुलै रोजी प्रभागनिहाय प्रारूप मतदार याद्या प्रसिद्ध केल्या जातील. त्यानंतर 29 जुलैपर्यंत हरकती व सूचना स्वीकारल्या जाणार आहेत. प्राप्त हरकतींची छाननी करून 4 ऑगस्ट रोजी अंतिम मतदार यादी प्रसिद्ध करण्यात येईल. मतदार याद्या तयार करताना संबंधित ग्रामपंचायतीच्या हद्दीतील सर्व पात्र मतदारांचा समावेश झाला आहे की नाही, तसेच हद्दीबाहेरील कोणताही मतदार यादीत समाविष्ट झालेला नाही, याची खातरजमा तहसीलदारांकडून करण्यात येणार आहे.

मतदार यादीचा कार्यक्रम
मतदार यादी ग्राह्य धरण्याचा दिनांक : 15 एप्रिल 2026
प्रभागनिहाय प्रारूप मतदार यादी : 24 जुलै 2026
हरकती व सूचना दाखल करण्याची अंतिम मुदत : 29 जुलै 2026
अंतिम मतदार यादी प्रसिद्ध : 4 ऑगस्ट 2026
संभाव्य ग्रामपंचायत निवडणुका : ऑक्टोबर-डिसेंबर 2026