जिल्ह्यात उद्या ग्रामपंचायतीचे मतदान

45 हजार मतदार बजावणार हक्क

| रायगड | जिल्हा प्रतिनिधी |

रायगड जिल्ह्यातील 10 तालुक्यातील 19 ग्रामपंचायतीच्या रिक्त असलेल्या सरपंचसह सदस्यपदांच्या 35 जागांसाठी प्रत्यक्ष पोट निवडणूक होणार आहे. या ग्रामपंचायतीचे मतदान मंगळवारी (दि.28) सकाळी साडेसात ते साडेपाच यावेळेत 32 केंद्रावर होणार असून, 45 हजार मतदार मतदानाचा हक्क बजावणार आहे. मतदान प्रक्रीया सुरळीत पार पाडण्यासाठी पोलिसांचा कडेकोट पहारा असणार आहे.

जिल्ह्यातील 30 सदस्य व पाच सरपंच पदासाठी असे आज एकूण 35 जागांसाठी मतदान होणार आहे. अलिबाग तालुक्यातील वैजाळी, नागाव व खंडाळे या ग्रामपंचायतीच्या सदस्यपदाच्या 3, मुरूड तालुक्यातील एकदरा ग्रामपंचायतीच्या 5, काशीदमधील 1, मांडलामधील 2 अशा एकूण 8, कर्जतमधील पाली तर्फे कोतल खलाटीमध्ये 2, खालापूरमधील होराळेमधील 2, माणगांवमधील वणीमलईकोंडमध्ये 1, रोहामधील पुईमध्ये 1, महाडमधील ताम्हाणेमधील 1, वराठीमध्ये 1, पोलादपूरमधील तुर्भे बुद्रूकमध्ये 2, श्रीवर्धनमधील दिवेआगरमध्ये 9 अशा एकूण सदस्यपदांच्या 30 जागांसाठी मतदान असणार आहे. तसेच, महाडमधील मोहोप्रे व वाळसुर, पोलादपूरमधील महालगूर, म्हसळामधील घोणसे आणि श्रीवर्धनमधील दिवेआगरमधील अशा एकूण सरपंच पदाच्या पाच जागांसाठी निवडणूक होणार आहे. या निवडणुकीची अंतिम तयारी पुर्ण झाली आहे. मतपेट्यांसह इतर साहित्य तसेच कर्मचारी मतदान केंद्रात सोमवारी (दि.27) दुपारपासून रवाना झाले. मंगळवारी (दि.28) सकाळी साडेसात वाजल्यापासून मतदानाला सुरुवात होणार आहे. यावेळी सुमारे 45 हजार मतदार मतदानाचा हक्क बजावणार आहेत. मतदान प्रक्रीया सुरळीत पार पाडण्यासाठी एकूण दोनशेहून अधिक अधिकारी व कर्मचाऱ्यांची नियुक्ती केली आहे. यावेळी पोलिसांचा कडेकोट बंदोबस्त असणार असल्याची माहिती प्रशासनाकडून देण्यात आली.

अलिबागमध्ये 3 हजार मतदार बजावणार हक्क
अलिबाग तालुक्यातील वैजाळी, नागाव व खंडाळे या ग्रामपंचायतीच्या सदस्य पदांच्या तीन जागांसाठी मतदान होणार आहे. नागाव ग्रामपंचायतीच्या सदस्यपदाच्या उमेदवार मंजुषा राणे, वैजाली ग्रामपंचायतीच्या सदस्यपदाचे उमेदवार नंदकुमार प्रभाकर पाटील, खंडाळे ग्रामपंचायतीच्या सदस्यपदाचे उमेदवार समिक्षा सागर गुरव हे शेकापचे उमेदवार निवडणुकीच्या रिंगणात आहे. तीन हजार 143 मतदार मतदानाचा हक्क बजावणार आहे. त्यामध्ये एक हजार 519 पुरुष आणि एक हजार 624 महिला मतदार आहेत. तालुक्यातील हाशिवरे वैजाळी येथील रायगड जिल्हा परिषद प्राथमिक शाळा, नागावमधील रायगड जिल्हा प्राथमिक शाळा, आणि तळवली येथील रायगड जिल्हा परिषद शाळेतील तीन मतदान केंद्रात मतदान प्रक्रीया पार पाडणार आहे.

69 जागा बिनविरोध
रायगड जिल्ह्यातील 126 ग्रामपंचायतींमधील पोट निवडणूकांचा कार्यक्रम जाहीर करण्यात आला होता. यावेळी 167 रिक्त सदस्यपदांपैकी 82 जागांसाठी एकही अर्ज प्राप्त झाला नाही. त्यामुळे 55 सदस्यपदांच्या जागा बिनविरोध झाल्या. तसेच, सरपंच पदाच्या 30 रिक्त जागांपैकी 14 जागा बिनविरोध निवडून आल्या असून 14 जागांसाठी एकही अर्ज प्राप्त झाला नसल्याची माहिती प्रशासनाकडून देण्यात आली.

स्थानिक सुट्टी जाहीर
रायगड जिल्ह्यातील विविध ग्रामपंचायतींमधील रिक्त झालेल्या पदांसाठी होणाऱ्या पोटनिवडणुकांच्या पार्श्वभूमीवर संबंधित कार्यक्षेत्रात मंगळवारी (दि.28)स्थानिक सुट्टी जाहीर करण्यात आली आहे. याबाबत जिल्हाधिकारी किशन जावळे यांनी आदेश जारी केला आहे. स्थानिक स्वराज्य संस्थांच्या निवडणुका शांततेत व सुरळीत पार पाडण्यासाठी संबंधित ग्रामपंचायत कार्यक्षेत्रात ही स्थानिक सुट्टी जाहीर करण्यात आल्याचे जिल्हाधिकारी कार्यालयाने स्पष्ट केले आहे.