| अमरावती | प्रतिनिधी |
लग्नकार्यात गोंधळ किंवा पाहुणे मंडळींचा रुसवा फुगवा ही साधारण गोष्ट असते. मात्र, अमरावतीमधील एका लग्नसमारंभात चक्क नवरदेवावरच जीवघेणा हल्ला करण्यात आल्याची घटना समोर आली आहे. अमरावतीच्या बडनेरा रोडवरील साहिल लॉनमध्ये सुरू असलेल्या लग्नसमारंभात मंगळवारी रात्री अचानक गोंधळ उडाला. साहिल लॉन येथे बडनेरा येथील सुजल समुद्रे याचा विवाह समारंभ सुरू असताना दोन युवकांनी नवरदेव सुजल समुद्रे याच्यावर धारदार चाकूने हल्ला केला. या हल्ल्याचे ड्रोन व्हिडिओ समोर आले आहेत. या हल्ल्यात नवरदेव सुजल हा जखमी झाला असून, नववधू आणि नवरदेवाची आई दोघेही चक्कर येऊन घटनास्थळीच पडल्याची माहिती आहे. या घटनेनं लग्न समारंभात आणि पै पाहुण्यात एकच खळबळ उडाली होती. याप्रकरणी, पोलिसांकडून आरोपींचा शोध घेण्यात येत आहे.
हल्लेखोरांनी नवरदेवावर भर स्टेजवर हल्ला करुन मंगल कार्यालयातून पळ काढला. त्यावेळी, नवरदेवाचे वडील राम समुद्रे यांनी आरोपींना पकडण्यासाठी त्यांचा पाठलाग केला असता त्यांच्यावर देखील आरोपीने चाकू हल्ला करण्याचा प्रयत्न केला. तसेच, आरोपी दुचाकी वाहनावर बसून पळून गेले. या हल्ल्यात नवरदेव गंभीर जखमी झाला असून, त्याला तातडीने उपचारासाठी रिम्स रुग्णालयात दाखल करण्यात आले होते, आज त्यास रुग्णालयातून घरी आणण्यात आले. मात्र, या घटनेमुळे लग्नात मोठं विघ्न आलं. समुद्रे कुटुंबीयांनी हा विवाह थांबवला असून, संपूर्ण कुटुंब दहशतीच्या सावटाखाली आहे.
लग्नाच्या स्टेजवरच नवरदेवावर हल्ला
