बहिष्कार, आरोप-प्रत्यारोपाने बैठक गाजली
| रायगड | जिल्हा प्रतिनिधी |
रायगडच्या जनतेला घराघरात पाणी पोहोचवण्याच्या गाजावाजा करणाऱ्या जलजीवन मिशनचा कारभार आता चव्हाट्यावर आला आहे. रखडलेली कामे, निकृष्ट पाइपलाईन, अपुऱ्या पाण्याच्या टाक्या आणि चुकीच्या सर्व्हेमुळे योजनांचा बोजवारा उडाल्याचे चित्र आहे. विशेष म्हणजे, पुण्यातील संस्थेने केलेला सर्व्हे चुकीचा असल्याची कबुली खुद्द पालकमंत्री भरत गोगावले यांनी व्यक्त केली. त्यामुळे जलजीवनच्या अंमलबजावणीवरच प्रश्नचिन्ह निर्माण झाले असून, पाणीपुरवठ्याच्या नियोजनातील त्रुटी कधी दूर होणार, असा सवाल उपस्थित होत आहे. त्यातच आढावा बैठकीवर राष्ट्रवादी काँग्रेसने बहिष्कार टाकल्याने प्रशासकीय त्रुटींसोबत राजकीय वादही समोर आला आहे. एकीकडे पाण्याचा प्रश्न गंभीर होत असताना दुसरीकडे बहिष्कार आणि प्रोटोकॉलवरून आरोप-प्रत्यारोप सुरू आहेत. त्यामुळे रायगडकरांच्या नशिबी पाणी की केवळ आश्वासनांचा पाऊस, असा संतप्त सवाल उपस्थित होत आहे.
रायगड जिल्ह्यामध्ये जलजीवनच्या योजना रखडल्या याची कल्पना आहे. तसेच, जलजीवन योजनांमध्ये अनेक त्रुटी आणि चुका आहेत. पुण्याच्या एका संस्थेने या योजनेचा सर्व्हे केला. परंतु, हा सर्व्हे चुकीचा झाला असल्याची खंत पालकमंत्री भरत गोगावले यांनी व्यक्त केली. त्यामुळे आगामी काळात पाण्याचा प्रश्न गंभीर निर्माण होऊ नये, यासाठी प्रयत्न करून या योजना पुर्णत्वास नेण्याचा प्रयत्न करा, अशी सुचना गोगावले यांनी अधिकाऱ्यांना दिली.
जलजीवन मिशन योजनाबाबत अलिबागमधील जिल्हा नियोजन समितीच्या सभागृहात पालकमंत्री भरत गोगावले यांच्या अध्यक्षतेखाली बुधवारी (दि.18)आढावा बैठक आयोजित करण्यात आली होती. त्यावेळी ते बोलत होते. यावेळी जिल्हा परिषद अध्यक्ष मंगेश वाकडीकर, कृषी सभापती वैकुंठ पाटील, जिल्हा परिषद मुख्य कार्यकारी अधिकारी नेहा भोसले आदींसह ग्रामीण पाणी पुरवठा विभागाचे कार्यकारी अभियंता मोहन सरवदे, जिल्ह्यातील ग्रामीण पाणी पुरवठा विभागाचे अभियंता, जिल्हा परिषद सदस्य उपस्थित होते. यावेळी पालकमंत्री भरत गोगावले यांनी तालुका स्तरावर जिल्ह्यातील जलजीवन योजनेच्या कामांचा आढावा घेतला. रखडलेल्या योजनांची माहिती घेऊन तात्काळ काम करण्याची सुचना अधिकाऱ्यांना दिली. वीस वर्षे डोळ्यासमोर ठेवून योजना राबविल्या जातात.
त्यानुसार पाण्याच्या टाकीची क्षमता असणे आवश्यक आहे. मात्र, त्या पद्धतीने काम होत नसल्याने योजना अडचणीत आल्या आहेत. येणारा काळ पाण्यासाठी फार कठीण आहे. जलजीवन योजनेसाठी असणारी पाईप लाईन न टीकणारी आहे. साठवून ठेवलेला पाईपचा साठा आगीने जळून गेला आहे. ज्या पद्धतीने पाण्याच्या टाकीची बांधणी हवी, तशी दिसत नाही, अशा अनेक तक्रारी आहेत. या योजनेत अनेक त्रुटी आणि चुका आहेत. या चुकांसह त्रुटी दूर करण्यासाठी प्रत्येकाने प्रयत्न करणे गरजेचे आहे. यावर्षी पाऊस 22 दिवस उशिरा पडला आणि सप्टेंंबरपासून पाऊस गायब झाला. त्यामुळे पाण्याचा दुष्काळ वाढण्याची शक्यता आहे. त्यामुळे पाण्याचा प्रश्न सोडविण्यासाठी योजनांची योग्य पद्धतीने अंमलबजावणी करण्यात यावी, अशी सुचना भरत गोगावले यांनी दिली.
राष्ट्रवादीच्या पदाधिकाऱ्यांसह सदस्यांचा बहिष्कार
पालकमंत्री भरत गोगावले यांच्या अध्यक्षतेखाली जिल्हा नियोजन समितीच्या सभागृहात जलजीवन मिशन योजनेच्या कामांचा आढावा बैठक बुधवारी घेण्यात आली. या बैठकीत महायूतीमधील अजित पवार गटातील राष्ट्रवादीचे पदाधिकारी व सदस्यांनी बहिष्कार टाकल्याची चर्चा जिल्हा परिषदेमध्ये सुरु आहे. बहिष्कार टाकण्याचे कारण स्पष्ट झाले नाही; परंतु, राष्ट्रवादीच्या पदाधिकाऱ्यांसह सदस्यांच्या गैरहजेरीने वेगवेगळ्या चर्चेला उत आला आहे.
प्रोटोकॉल न पाळण्याचा आरोप
जलजीवन योजनेच्या आढावा बैठक ही जिल्हा परिषद पदाधिकारी, सदस्य आणि ठेकेदांरासमवेत घेण्याची मागणी जिल्हा परिषद सदस्यांनी अध्यक्षांकडे केली होती. परंतु, जिल्हा परिषद अध्यक्षांनी त्या मागणीची दखल न घेता पालकमंत्र्यांच्या उपस्थितीत बैठक का घेतली, याबाबत उलगडा झाला नाही. पालकमंत्री यांच्या अध्यक्षतेखाली बैठक होत असताना जिल्ह्यातील मंत्री, आमदार व इतर लोकप्रतिनिधींनाही बोलावणे गरजेचे होते. त्या नियमांचे पालन करण्यात आले नाही. या बैठकीत ज्यांचा काहीही संबंध नाही, ते व्यासपिठावर होते. त्यामुळे या बैठकीत प्रोटोकॉल पाळण्यात आला नाही, असा आरोप जिल्हा परिषदेचे उपाध्यक्ष मधुकर पाटील यांनी केला आहे. त्यामुळे या बैठकीत उपस्थित राहिलो नसल्याचे त्यांनी सांगितले.
पनवेल येथे झालेल्या जिल्हा परिषदेच्या बैठकीमध्ये जलजीवनची स्वतंत्र बैठक दि.13 नोव्हेंबर रोजी घेण्याचे ठरले होते; मात्र, ही बैठक पालकमंत्री यांच्या उपस्थितीत होणार, हे ठरले नव्हते. जर पालकमंत्री जलजीवनच्या बैठकीत होते तर राष्ट्रवादी पक्षाच्या मंत्र्यांना देखील आमंत्रण द्यायला हवे होते. त्यामुळे राष्ट्रवादी काँग्रेसचे सर्व सदस्य आणि सभापती या बैठकीला उपस्थित नव्हते.
अमित नाईक,
गटनेता, राष्ट्रवादी काँग्रेस पक्ष






