नांदगांव येथे जिल्हा कृषी मेळाव्याचे आयोजन
। मुरूड जंजिरा । वार्ताहर ।
सध्याच्या जागतिक हवामान बदलामुळे,नैसर्गिक वादळांसारख्या आस्मानी संकटे व कोव्हिड-19 महामारीमुळे शेतकर्‍यांवर आलेल्या आर्थिक संकटातून मार्ग काढण्यासाठी शेतकर्‍याना योग्य ते मार्गदर्शन होण्यासाठी महाराष्ट्र राज्य आंबा उत्पादक महासंघाच्यावतीने मुरुड तालुक्यातील यशवंतनगर पंचक्रोशीत जिल्हा कृषी मेळावा यशवंतनगर येथिल उसरोली टेपावर आगरी समाज सभागृहात सकाळी दहा वाजता होणार आहे.
गेली पाचसहा वर्षे अवेळी पाऊस,अतिवृष्टी,चक्रीवादळे,गारपीट,थंडीची अनिश्‍चितता,वाढते उष्ण तापमानामुळे कोकणातीलआंबा,काजु,नारळ,सुपारी,भाजीपाला अशा सर्व प्रकारच्या फलोत्पादनावर विपरित परिणाम होऊन उत्पादन साठ टक्क्याने घटून ते चाळीस टक्क्यावर आले आहे.शिवाय कोव्हिडच्या निर्बंधांमुळे विक्री व्यवस्था पूर्णपणे कोलमडल्याने शेतकरी आर्थिक संकटात सापडला आहे.म्हणून त्यांना मार्गदर्शनाची अत्यंत गरज आहे.
लवकर चनवीन भाजीपाला लागवड,आंब्यावरील कीड रोगांचा प्रादुर्भाव कमी करण्यासाठी आवश्यक कृषी औषधांच्या फवारणीबाबत मार्गदर्शन तसेच तोंडली,सफेद कांदा ,भाजीपाला व सर्व प्रकारच्या फलोत्पादनाचे शेतकर्‍यांना या वर्षी चांगले उत्पादन घेता यावे यासाठी महाराष्ट्र राज्य आंबा उत्पादक संघाच्यावतीने कोकणात शेतकरी मेळावे आयोजित करण्यात येणार आहेत. त्याचाच एक भाग म्हणूनहा जिल्हास्तरीय कृषी मेळावा आयोजीत करण्यात आल्याचे मोकल यांनी स्पष्ट केले आहे.
सदर मेळाव्यात शेतकर्‍यांना लॉकडाऊनमुळे विक्री व्यवस्था पूर्णपणे कोलमडल्याने ठोस विक्री व्यवस्था उपलब्ध करुन देण्याबाबत मार्गदर्शन करण्यात येणार आहे.तसेच यावेळी युपीएल कंपनीच्यावतीने खते,किटकनाशके व अन्य उत्पादनांबाबत सादरीकरण करण्यात येणार आहे जिल्ह्यातील कृषी फलोत्पादन क्षेत्रातील प्रयोगशील शेतकर्‍यांना सन्मानीत करण्यात येणार आहे.
मेळाव्यात रायगड जिल्ह्याचे उपविभागीय कृषी अधिकारी कैलास वानखेडे, मुरुड तालुका कृषी अधिकारी विश्‍वजीत अहिरे,युपीएलचे ऑल इंडिया व्यवस्थापक अभिजित जगदाळे,झोनल मार्केटींग व्यवस्थापक पश्‍चिम महाराष्ट्र व कोकण विभाग अमित गायकवाड आदी उपस्थित राहून मार्गदर्शन करणार आहेत.कोरोना विषयीचे सर्व नियम पाळून होणार्‍या या मेळाव्याला शेतकरी बांधवांनी मोठ्या संख्येने उपस्थित राहावे असे अवाहन चद्रंकात मोकल यांनी केले आहे.