जि.प. सीईओंच्या उपाययोजना करण्याच्या सूचना
। अलिबाग । विशेष प्रतिनिधी ।
रायगड जिल्ह्यात कोरोना रुग्णांच्या वाढत्या संख्येमुळे पुन्हा एकदा चिंतेचे वातावरण निर्माण झाले आहे. ओमिक्रॉन आणि कोरोनाबाधितांची ही वाढती संख्या लक्षात घेता जिल्हा परिषदेची आरोग्य यंत्रणा पुन्हा एकदा सज्ज झाली असून, आवश्यक त्या उपाययोजना करण्याच्या सूचना जिल्हा परिषदेचे मुख्य कार्यकारी अधिकारी डॉ. किरण पाटील व जिल्हा आरोग्य अधिकारी डॉ. सुधाकर मोरे यांनी तालुका आरोग्य अधिकारी व प्राथमिक आरोग्य केंद्र वैद्यकीय अधिकार्‍यांना दिल्या आहेत. सद्यःस्थितीत रायगड जिल्ह्यातील ग्रामीण भागातही कोरोना रुग्णसंख्या व पॉझिटिव्हीटी रेट वाढत आहे. त्यामुळे कोरोनाचा प्रादुर्भाव व प्रसार रोखण्यासाठी व रुग्णांवर उपचार करण्यासाठी आरोग्य सुविधांची वाढ व उपलब्धता करणे आवश्यक आहे. त्यानुसार आवश्यक त्या उपाययोजना करण्यात येत आहेत. नागरिकांनीही कोरोनाचा होणार प्रसार रोखण्यासाठी सहकार्य करावे, एकमेकांसोबत बोलताना सामाजिक अंतर पाळावे, मास्कचा वापर करावा, सॅनिटाईझरने वारंवार हात स्वच्छ करावेत, प्रतिबंधात्मक लसीकरण डोस घ्यावेत, कोरोनाची लक्षणे असल्यास वेळीच तपासणी करून घ्यावी, सरकारने सुचविलेल्या सर्व उपाययोजना तसेच निर्बंधांचे पालन करावे, असे आवाहनही डॉ. किरण पाटील व डॉ. सुधाकर मोरे यांनी केले आहे.
काय आहेत सूचना!
- ज्या ठिकाणी कोरोना रुग्णसंख्या वाढत आहे, तेथे कंटेनमेंट झोन घोषित करण्याच्या अनुषंगाने उपजिल्हाधिकारी, तहसीलदार यांच्याकडे प्रस्ताव सादर करणे. उपविभागीय अधिकारी यांच्याकडून जाहीर केलेले कंटेनमेंट झोनची माहिती कार्यालयाकडे सादर करणे.
- कोणत्याही परिस्थितीत पहिल्या तीन दिवसांमध्ये संपूर्ण बाधित रुग्णांचे किमान 20 कॉन्ट्रॅक्ट ट्रेसिंग करुन त्यांच्या चाचण्या पूर्ण करण्याचे नियोजन करावे. तालुका आरोग्य अधिकारी, वैद्यकीय अधिकारी यांनी आपल्या कार्यक्षेत्रातील सर्व नागरिकांचे लसीकरणाचे पहिला डोसचे 100 टक्के उद्दिष्टे साध्य करावे. तसेच ज्या
- नागरिकांचा दुसरा डोस देय आहे, अशा सर्व नागरिकांना दुसरा डोस देण्याबाबत आवश्यक ती कार्यवाही तात्काळ करण्यात याव्यात.
- वैद्यकीय अधिकारी यांनी आपल्या प्राथमिक आरोग्य केंद्रांचे दैनंदिन अहवाल तालुका आरोग्य अधिकारी यांना सादर करावेत. तालुका आरोग्य अधिकारी यांनी सदर रिपोर्ट जिल्हा कार्यालयास सादर करावेत.
- सर्व प्राथमिक आरोग्य केंद्र तसेच सीसीसी सेंटरचे स्ट्रक्चरल ऑडिट, फायर ऑडिट, इलेक्ट्रीकल ऑडिट, ऑक्सिजन ऑडिट करुन घेणे. कोणत्याही प्राथमिक आरोग्य केंद्र तसेच सीसीसी सेंटरमध्ये दुर्घटना होऊन जीवितहानी होणार नाही याची दक्षता घ्यावी.
- सर्व प्राथमिख आरोग्य केंद्र तसेच सीसीसी सेंटरमध्ये आग प्रतिबंधात्मक उपाययोजना, स्ट्रक्चरल दुरुस्ती, ऑक्सिजन गळती, अखंडित विद्युत पुरवठा इ. बाबतची खातरजमा करावी.
- जिल्ह्यातील सामाजिक संस्थांच्या स्वयंसेवकांच्या माध्यमातून कोरोनाबाधित रुग्णांना संपर्क करुन त्यांना येणार्‍या समस्यांबाबत मार्गदर्शन करावे, याकामी जिल्हा मानसोपचार तज्ज्ञांची मदत घेऊन कोरोनाबाधित रुग्णांचे मनोधैर्य वाढविण्यास मदत करणे.
- खासगी हॉस्पिटलमध्ये डॉक्टर्स, नर्सेस, स्टाफ, आयसीयु बेड व ऑक्सिजन बेड इत्यादी आवश्यक सुविधा उपलब्ध होतील याचे नियोजन करणे. जास्तीत जास्त खासगी हॉस्पिटल कोरोना रुग्णांसाठी उपलब्ध होतील यांचे नियोजन करावे.