रायगड जिल्ह्यातील कोरोना योद्ध्यांवर उपासमार

आरोग्य विभागातील कंत्राटी वाहक, सफाई कामगारांचे मानधन 8 महिन्यांपासून थकीत
अलिबाग । शहर प्रतिनिधी ।
जिल्हा परिषदेच्या आरोग्य विभागांतर्गत प्राथमिक आरोग्य केंद्र स्तरावर कंत्राटी वाहनचालक व सफाईगाराची नियुक्ती करण्यात आली आहे; मात्र या वाहनचालक, सफाईकामगारांचे गेल्या 8 महिन्यांपासूनचे मानधन थकीत असल्याने हे कर्मचारी अडचणीत आले आहेत. रायगड जिल्ह्यातील 54 वाहन चालक व 48 सफाई कामगार गेल्या आठ महिन्यांपासून मानधनाशिवाय काम करीत असून कोरोना योद्ध्यांवरच उपासमारीची वेळ आल्याने जिल्हा परिषद आरोग्य अधिकारी डॉ. सुधाकर माने यांच्याविरोधात तीव्र नाराजी व्यक्त करण्यात येत आहे.
दरम्यान, कंत्राटी वाहनचालक व सफाईगारांनी जिल्हा परिषदेचे आरोग्य अधिकारी डॉ. सुधाकर मोरे यांची बुधवारी (दि.15) भेट घेऊन त्यांना समस्यांबाबतचे निवेदन दिले. रायगड जिल्हा परिषदेअंतर्गत येणार्‍या आरोग्य विभागातील प्राथमिक आरोग्य केंद्रात 54 वाहन चालक व 48 सफाई कामगार कंत्राटी कामगार कार्यरत आहेत. त्यांचे 8 महिन्यांचे मानधन थकीत असल्यामुळे बुधवार (दि. 15) रोजी कर्मचार्‍यांनी रायगड जिल्हा परिषदेसमोर निदर्शने केली.
कोरोनाच्या कठीण कालावधीत 24 तास या कंत्राटी कर्मचार्‍यांनी सेवा दिली. अशा भयावह परिस्थितीतही त्यांनी लसीकरणाच्या कालावधीत नियुक्ती आदेश नसतानाही डीएचओ डॉ. देसाई यांच्या तोंडी आदेशाने काम केले.
मार्च ते ऑगस्ट 2021 या सहा महिन्यांचे व नोव्हेंबर, डिसेंबर 2018 चे असे एकूण आठ महिन्यांचे मानधन प्राप्त अद्यापी त्यांना मिळालेले नाही. गेले आठ महिने मानधन मिळत नसल्याने हतबल झालेल्या कर्मचार्‍यांनी अखेर बुधवारी जिल्हा परिषदेसमोर निदर्शने केली. तसेच पैसे नसल्यामुळे उपासमार तसेच कुटूंबातील सदस्यांचे आजारपण करणे त्यांना कठीण जात असल्याचे व्यथा त्यांनी बोलून दाखविली. त्यामुळे कर्मचार्‍यांचे मानधन तात्काळ मिळावे याकरीता डॉ. सुधाकर मोरे यांना कर्मचार्‍यांकडून निवेदन देण्यात आले आहे.
याशिवाय मुख्य कार्यकारी आधिकारी किरण पाटील व जिल्हाधिकारी महेंद्र कल्याणकर यांनाही निवेदन देण्यात येणार असल्याचे कर्मचार्‍यांनी सांगितले.