| अलिबाग | प्रमोद जाधव |
वाढता पायाचा ताण, वेगवेगळे त्वचेच्या आजारामुळे नागरिक त्रस्त होतात. त्यावर उपचार करताना मोठा आर्थिक फटकाही बसतो. परंतु फिश स्पा माध्यमातून त्वचेचे आजार व पायाचा ताण कमी होण्यास मदत होणार आहे. अलिबागमधील सागर भगत यांच्या संकल्पनेतून वरसोली समुद्रकिनारी म्हात्रेवाडी येथे पहिल्यांदा डॉ. फिश स्पा सुरु केले आहे. शेकाप महिला आघाडी प्रमुख चित्रलेखा पाटील यांच्या प्रमुख उपस्थितीत फिश स्पाचा उद्घाटन सोहळा नुकताच पार पडला. यावेळी सुरेश खोत, शरद वरसोलकर, कृष्णा भगत, हिरा भगत, डॉ. फिश स्पाचे मालक सागर भगत, कविता भगत, रोशन पाटील, प्रितेश शिवलकर, अंकुर गायकर, प्रतिक पाटील, रोहित पाटील, शुभम शिवलकर, प्रमोद पाटील, यश नागवेकर, आर्या भगत, रिद्धांत भगत आदी उपस्थित होते.
सतत पाय दुखणे, पायाला ताण पडणे, भेगा पडणे अशा अनेक समस्यांमुळे नागरिक त्रस्त झाले आहेत. त्वचेच्या या आजारांवर उपचार करूनही बरे होत नसल्याच्या तक्रारी वाढत आहेत. सतत गोळ्या औषधे घेऊनही त्वचेचे आजार बरे होत नसल्याची ओरड कायमच राहिली आहे. पायामुळे होणारे ताण, भेगांवर उपचार करण्यासाठी अलिबागमधील उच्चशिक्षित सागर भगत यांनी एक वेगळा प्रयोग केला आहे. अलिबाग तालुक्यातील वरसोली येथे समुद्रकिनाऱ्यालगत म्हात्रेवाडी येथे डॉ. फिश स्पा सुरु केले आहे. या फिश स्पामुळे मृत त्वचा काढणे, ताण व तणाव कमी करणे, त्वचा गुळगुळीत व मुलायम करणे, पायातील वेदना कमी करणे, त्वचा चमकणे, सोरायसिस रोगाचा उपचारदेखील होण्यास मदत होणार असल्याची माहिती सागर भगत यांनी दिली आहे. पंधरा मिनीट ते एक तासापर्यंत स्पा केली जाणार आहे. अलिबागमध्ये पहिल्यांदाच फिश स्पा उपलब्ध झाला आहे.
फिश स्पा गोवा व अन्य राज्यात सुुरू आहे. गोवा येथून फिश स्पाचे धडे घेऊन त्याचा अभ्यास केला. आपल्या ज्ञानाचा फायदा अलिबागमधील त्वचेचे आजार असलेल्या नागरिकांना व्हावा यासाठी त्यांनी डॉ. फिश स्पा सुरु केला आहे.
सागर भगत