नैनाविरोधात शेतकऱ्यांचे बेमुदत उपोषण
| पनवेल | प्रतिनिधी |
पनवेल तालुक्यातील 23 गावांमध्ये प्रस्तावित असलेल्या नैना प्रकल्पाला शेतकऱ्यांचा विरोध होत आहे. पनवेल तालुक्यातून नैना प्रकल्प हद्दपार करण्यासाठी शेतकऱ्यांनी सहा डिसेंबरपासून बेमुदत उपोषण पुकारले आहे.
स्थानिक शेतकऱ्यांना न्याय मिळवून देण्यासाठी अनिल ढवळे, दमयंती भगत, जयराम कडू, मधुकर पाटील, समीर पारधी, रवींद्र गायकर या सहा जणांनी नैना प्रकल्पविरोधात बेमुदत उपोषण सुरु केले आहे. या बेमुदत उपोषणाला पाठिंबा देण्यासाठी शेतकऱ्यांची संख्या उपोषणस्थळी वाढणार असल्याचे उपोषणकर्त्यांनी सांगितले. नैना प्रकल्पामुळे शेतकरी उध्वस्त होणार असल्याने शेतकऱ्यांच्या मानगुटीवर बसलेले ‘ नैना’ प्रकल्पाचे भूत हद्दपार करण्याचा ठाम निर्धार शेतकऱ्यांनी केला आहे. यावेळी माजी आमदार बाळाराम पाटील, काशिनाथ पाटील, जी. आर. पाटील, शिवसेनेचे बबन पाटील, पालिकेचे माजी विरोधी पक्षनेते प्रितम म्हात्रे, ऍड. सुरेश ठाकूर, शेखर शेळके, सुदाम पाटील, वामन शेळके, नामदेव फडके, विश्वास पेटकर, बाळाराम फडके, विलास फडके यांच्यासह अनेक जण उपस्थित होते.
नैनाच्या माध्यमातून चुकीच्या पध्दतीने भुखंड वाटप, गुरचरण, गायरान ग्रामपंचायतीच्या मालकीच्या जागा, गावकीच्या मालकीच्या जागा, इतर शासकीय जागा व सामाजिक जागा चुकीच्या पध्दतीने सरकार सिडकोच्या घशात घालून स्थानिक ग्रामस्थांचे अधिकार हिसकावून घेत आहे. शेतकरी बांधकाम व्यवसायिक आणि ग्रामस्थांना प्रकल्पाचे फायदे- तोटे न समजावता प्रकल्प लादण्याचे काम चालू आहे. स्थानिकांची घरे, चाळी, इमारती, फार्म हाऊस व इतर बांधकामे बेकायदेशीर ठरवून त्यांना नोटीस देऊन तोडण्याचे काम चालू आहे. नैना प्रशासन मोफत 60 टक्के जमीन घेऊन शेतकऱ्यांवर अन्याय करत असून, ही दडपशाही सहन केली जाणार नाही. शेवटच्या घटकाला न्याय मिळेपर्यंत हा संघर्ष चालू राहील, अशा पद्धतीचा संदेश यावेळी देण्यात आला. नैना प्रकल्प आम्हाला नकोच, आमच्या जमिनी फुकट घेणाऱ्या नैनाला आमचा विरोध आहे. ‘जमीन आमच्या हक्काची, नाही कुणाच्या बापाची’ या अशा घोषणा यावेळी देण्यात आल्या.
सुरू होणाऱ्या हिवाळी अधिवेशनात या आंदोलनाची सरकारला दखल नक्कीच घ्यावी लागेल, असा आत्मविश्वास यावेळी माजी आमदार बाळाराम पाटील यांनी बोलून दाखवला. तुम्ही -आम्ही एकत्र आलो तर विजयापासून आपल्याला कोणीही रोखू शकणार नाही असे सांगून शासनाने नैनाऐवजी एमएमआरडीए, महापालिका क्षेत्र घोषित करावे . आपली भाकरी वाचवण्याच्या दृष्टीने या उपोषणात सहभागी होण्याचे आवाहन बाळाराम पाटील यांनी यावेळी केले.
महाराष्ट्राचे सरकार शेतकऱ्यांच्या मुळावर उठले आहे. भूमिपुत्रांना देशोधडीला लावण्याचे काम तीन इंजिनचे सरकार करीत आहे. ग्रामस्थांचा या प्रकल्पाला विरोध असतानाही सिडको जाणीवपूर्वक त्यांच्यावर प्रकल्प लादण्याचा प्रयत्न करत आहे. परंतु ते कधीही यशस्वी होणार नाही. शिवसेना पक्ष पूर्ण ताकदीनिशी या लढ्यामध्ये उतरणार आहे.
अनंत गीते, शिवसेना नेते
On 7th June 1937, Krushival was started as a weekly magazine and the masses got their platform. In the Raigad district, many new movements were launched to fight against injustice and exploitation upon the underprivileged and the hard-working common people.