सिडकोकडून कायदेशीर कारवाईचा इशारा
| उरण | प्रतिनिधी |
उरण तालुक्यातील धुतुम येथील द्रोणगिरी नोडमधील इंडियन ऑईल टॅकिंग लिमिटेड कंपनीने भुईभाड्यापोटी थकविलेले 547 कोटी रुपये सात दिवसांत भरण्याचे आदेश सिडकोने दिले आहेत. मुदतीत रक्कम न भरल्यास कायदेशीर कारवाई करण्याचा इशाराही सिडकोने या कंपनीला नोटीसीव्दारे दिला आहे.
उरण तालुक्यातील धुतुम येथील द्रोणागिरी नोड मधील प्रभाग 1मध्ये इंडियन ऑईल टँक प्रकल्प आहे. या प्रकल्पासाठी सिडकोने हा भुखंड भुईभाड्याने दिलेला आहे. या प्रकल्पातून 1996 पासून जेएनपीए बंदरातून परदेशातून आयात करण्यात येणाऱ्या तेलजन्य पदार्थांची साठवणूक करणाऱ्या लाखो किलो लिटर्सच्या टाक्या आहेत. परंतु, सुरूवातीपासूनच कंपनीने भाड्याने घेतलेल्या भुखंडाचे भाडे भरण्यात सातत्याने दिरंगाईच चालविली होती. कंपनीच्या या अनागोंदी कारभारामुळे शासनाचा अतोनात महसूल बुडत असल्याने रांजणपाडा येथील सामाजिक कार्यकर्ते राम पाटील यांनी सिडको, जिल्हाधिकारी व तहसीलदार यांच्याकडे अनेकदा तक्रारी केल्या आहेत. सातत्याने पाठपुरावा केल्यानंतरही शासकीय यंत्रणा कारवाई करण्यास सातत्याने टाळाटाळ करीत असल्याने राम पाटील यांनी ही गंभीर बाब आमदार नाना पटोले यांच्या निदर्शनास आणून दिली होती. पटोले यांनी विधानसभेत तारांकिंत प्रश्न मांडल्यानंतरच जाग आलेल्या सिडकोने अखेर भुईभाड्यापोटी थकविलेल्या 547 कोटी रुपये सात दिवसांत भरण्याचे आदेश सिडकोने दिले आहेत, अशी माहिती राम पाटील यांनी दिली.