प्रॉपर्टी कार्डसाठी शेतकरी प्रबोधिनीचा पुढाकार

ग्रामस्थांनी दाखल केले 92 अर्ज

| उरण | वार्ताहर |

रायगड जिल्ह्यातील उरण तालुक्यातील विविध गावातील गावठाण विस्ताराचा गंभीर प्रश्न आहे. ‘शेतकरी प्रबोधिनी’ या सामाजिक संघटनेनेच्या पुढाकारातून बालई काळाधोंडाच्या 92 ग्रामस्थांनी प्रॉपर्टी कार्ड मिळावे यासाठी ग्रामपंचायतीमध्ये अर्ज दाखल केले.

उरण तालुक्यातील चाणजे ग्रुपग्रामपंचायत हद्दीतील बालई काळाधोंडा येथील राहत्या घरांना सनद (प्रॉपर्टी कार्ड) मिळालेले नाही. यासाठी ग्रामस्थांना अधिक संघर्ष करावा लागत आहे. या प्रश्नी शेतकरी प्रबोधिनीचे संस्थापक अध्यक्ष राजाराम पाटील यांची भेट घेतली होती. त्यांनतर पाटील यांच्या मार्गदर्शनाखाली ग्रामविकास अधिकारी रामकृष्ण म्हात्रे यांची भेट घेऊन सविस्तर चर्चा केली. बालई काळाधोंडा ग्रामविकास परिषदेने लोकवर्गणी काढून गावठाणाचे विस्तारीकरण केले आहे. गावठाणाचा 122 एकरचा नकाशा तयार करुन शासनास सादर केला आहे. त्याचबरोबर जागरुक नागरिकांनी 100 प्रॉपर्टीकार्डचे प्रस्ताव स्वतः उरणच्या तहसिलकार्यालयासह भूमिअभिलेख विभागाकडे सादर केले आहेत. तशाच प्रकारचे 92 प्रस्ताव ग्रुप ग्रामपंचायत चाणजेमध्ये दाखल करण्यात आले आहेत.

बालईतील एकूण घरांची संख्या एक हजार 111 एवढी आहे. केवळ 10 टक्के लोकांचेच हे अर्ज आहेत. अजून इतर लोकांचे अर्ज टप्प्या टप्प्याने ग्रुप ग्रामपंचायत चाणजेमध्ये देण्यात येणार आहेत, अशी माहिती राजाराम पाटील यांनी दिली. शेतकऱ्यांची, जमीन मालकांची, ग्रामस्थांची बाजू पाटील यांनी मांडून प्रॉपर्टी कार्ड नागरिकांना किती महत्वाचे आहे हे ग्रामविकास अधिकारी रामकृष्ण म्हात्रे यांच्या निदर्शनास आणून दिले. त्यानंतर म्हात्रे यांनी योग्य ते सहकार्य करण्याचे आश्वासन दिले. ग्रामपंचायतीमध्ये बालई काळाधोंडा ग्रामस्थांना प्रॉपर्टी कार्ड मिळावे यासाठी मासिक सभेत ठरावही घेण्यात आल्याचे म्हात्रे यांनी सांगितले. बालई काळाधोंडा ग्रामस्थांना चांगले सहकार्य केल्या बद्दल सरपंच अमित भगत, ग्रामविकास अधिकारी रामकृष्ण म्हात्रे, सर्व ग्रामपंचायत कर्मचाऱ्यांचे यावेळी बालई ग्रामस्थांनी आभार मानले. या कामी चाणजे ग्रुप ग्रामपंचायतचे विद्यमान सदस्य बबन चव्हाण, शेतकरी प्रबोधिनीचे संस्थापक अध्यक्ष राजाराम पाटील, बालई काळाधोंडा ग्रामविकास परिषदेचे सचिव रविंद्र चव्हाण तसेच बालई काळाधोंडा ग्रामविकास परिषदेच्या सर्व पदाधिकारी सदस्यांचे विशेष सहकार्य लाभले आहे.