उरणमधील ग्रामसेवकांच्या नियमबाह्य बदल्यांची चौकशी

। उरण । वार्ताहर ।
उरण पंचायत समितीच्या गटविकास अधिकारी यांनी नियमबाह्य बदल्या केल्या असल्याची तक्रार करून नियमबाह्य केलेल्या बदल्या करणार्‍यांची विभागीय चौकशी करून त्यास निलंबन करण्याची मागणी सामाजिक कार्यकर्ते अजित म्हात्रे यांनी केली होती. या तक्रारीची दखल घेऊन चौकशी करण्याचे आदेश उपायुक्त (महसूल) तथा पदसिद्ध विशेष कार्य अधिकारी मुख्यमंत्री सचिवालय कक्ष कोकण विभागचे मकरंद देशमुख यांनी रायगड जिल्हा परिषदेचे मुख्यकार्यकारी अधिकारी यांना दिले आहेत. यामुळे उरण पंचायत समितीमधील संबंधित अधिकारी वर्गाचे धाबे दणाणले आहेत.

सामाजिक कार्यकर्ते अजित कृष्णा म्हात्रे यांनी उरण गटविकास अधिकारी यांनी नियमबाह्य ग्रामविकास अधिकारी यांच्या बदल्या करण्याचे आदेश काढले आहे. ते शासन जीआरमध्ये नमूद केल्याप्रमाणे नसून नियमबाह्य आहेत. केवळ आर्थिक स्वार्थासाठी केलेले आदेश असल्याचा आरोप अजित म्हात्रे यांनी केला आहे. त्यामुळे गटविकास अधिकारी यांचे विरोधात विभागीय चौकशी होऊन त्यांना निलंबित करण्यात यावे अशी मागणी सामाजिक कार्यकर्ते व पर्यावरण विभाग पनवेल तालुका अध्यक्ष अजित कृष्णा म्हात्रे यांनी उद्धव ठाकरे व कोकण आयुक्त कोकण विभाग यांच्याकडे दि.1/4/2022 रोजी केली आहे. या तक्रार अर्जासोबत काढण्यात आलेल्या नियमबाह्य बदल्यांच्या प्रती जोडल्या आहेत.

सामाजिक कार्यकर्ते अजित म्हात्रे यांच्या तक्रारीची दखल उपायुक्त (महसूल) तथा पदसिद्ध विशेष कार्य अधिकारी मुख्यमंत्री सचिवालय कक्ष कोकण विभागचे मकरंद देशमुख यांनी घेऊन रायगड जिल्हा परिषदेचे मुख्यकार्यकारी अधिकारी यांना सदर प्रकरणाची योग्य ती चौकशी करून शासनाच्या प्रचलित कायदे व नियम धोरणानुसार उचित कार्यवाही करावी. तसेच करण्यात आलेल्या कार्यवाहीची माहिती अर्जदार यांना परस्पर कळवावी तसेच एक प्रत विभागीय आयुक्त कार्यालयातील मुख्यमंत्री सचिवालय कोकणभवन, नवी मुबंई या कार्यालयाकडे विनाविलंब पाठविण्याचे आदेश दिले आहेत.

गटविकास अधिकारी नीलम गाडे यांच्याकडे विचारणा केली असता त्यांनी वरिष्ठांच्या आदेशानुसार बदल्या केल्याचे सांगितले. परंतु तक्रारदार अजित म्हात्रे यांनी तक्रार अर्जात जोडलेल्या प्रतीमध्ये ग्रामसेवकांच्या बदल्यांचे आदेश हे गटविकास अधिकारी गाडे यांच्या सहीने पारित झाल्याचे दिसत आहे.