कुंभमेळाव्याच्या सुरक्षेसाठी आयटीयूएसची निवड

। पाली/बेणसे । प्रतिनिधी ।

उत्तर प्रदेशातील प्रयागराजमध्ये 13 जानेवारी 2025 रोजीपासून सुरू होणारा महाकुंभ मेळाव्यासाठी 40 कोटी भाविक संगमावर पवित्र स्नानासाठी येणार आहेत. हा जगातील सर्वात मोठ्या धार्मिक समारंभांपैकी एक असणार आहे. त्यामुळे हा सोहळा यशस्वीरित्या पार पाडण्यासाठी उत्तर प्रदेश दहशतवादविरोधी पथकाने कुंभमेळावा 2025 साठी बचाव पथके आणि उभयचर बोटी उपलब्ध करून देण्यासाठी महत्त्वाचा करार केला आहे. ज्यामध्ये आयटीयूएस मरीनचा देखील समावेश आहे. ही बोट पाण्यावर आणि जमिनीवरही चालते.

या कराराअंतर्गत, आयटीयूएस मरीन उत्तर प्रदेश एटीएसला उभयचर बोटी आणि प्रशिक्षित बचाव पथके उपलब्ध करून देईल. ज्यामुळे गंगा नदीच्या काठावर आयोजित कार्यक्रमामध्ये गर्दीचे व्यवस्थापन, हवामानातील अनिश्‍चितता आणि इतर आव्हानांना सामोरे जाण्यास मदत करणार असल्याचे आयटीयूएस मरीनचे व्यवस्थापक अंकित वाघ यांनी सांगितले. महाराष्ट्रात मुख्यालय असलेली आयटीयूएस मरीन ही प्रमुख समुद्री सुरक्षा उपाययोजना पुरवठादार कंपनी आहे. जी बचावकार्य, उभयचर तंत्रज्ञान आणि आपत्ती व्यवस्थापन यामध्ये तज्ज्ञ आहे.