कंपनीच्या चौघा अधिकार्‍यांचे निलंबन
। रत्नागिरी । प्रतिनिधी |
जयगड येथील जिंदाल कंपनीच्या परिसरात गुरूवारी (दि.12) दुपरच्या सुमारास एलपीजी वायू गळतीची घटना घडली होती. या वायुगळतीमुळे नजीकच्या नांदीवडे माध्यमिक विद्यामंदिर आणि कनिष्ठ महाविद्यालयातील विद्यार्थ्यांना त्रास जाणवू लागला आणि मुले बेशुद्ध पडू लागली होती. तसेच, श्‍वसनाचा त्रास सुरु झाल्याने मळमळ होऊन मुले उलट्या देखील करु लागली होती. अशा बाधित मुलांना मिळेल त्या खाजगी गाडीने रत्नागिरी जिल्हा शासकीय रुग्णालयात दाखल करण्यात आले होते. तर, काहींना तेथील ऊर्जा आरोग्य केंद्रात भरती करण्यात आली होती. या प्रकाराने जयगड भागात भीतीचे वातावरण पसरले असताना कंपनीने या प्रकाराबाबत हात झटकले होते. मात्र, स्थानिकांनी राजकीय पक्षांच्या मदतीने आवाज उठवल्याने कंपनीने चार अधिकार्‍यांचे निलंबन केले असून या प्रकाराची चौकशी सुरु केली आहे.
या घटनेतील 60 विद्यार्थी व एका महिलेवर उपचार करण्यात आले आहेत. जेएसडब्ल्यू कंपनीच्या पोर्ट विभागातील एलपीजी प्रकल्पाच्या देखभालीचे काम सुरु होते. या एलपीजी कामावर नियंत्रण असणारे अधिकारी गंगाधर बंडोपाध्याय, भाविन पटेल व अभियंते सिध्दार्थ कोरे व दीप विटलानी यांनी योग्य ती काळजी न घेतल्याने व त्यांच्या निष्काळजीपणामुळे वायु हवेत पसरल्याने या घटनेला हेच जबाबदार असल्याचे तक्रारीत म्हटले आहे. यामुळे त्यांच्यावर गुन्हा दाखल करण्यात आला आहे.
कंपनीच्या मनमानीमुळे मच्छीमारांना फटका
जयगड येथील जिंदाल कंपनीच्या मनमानी कारभारामुळे मच्छीमारांना मोठा फटका बसला आहे. ज्या ठिकाणी जिंदाल कंपनीचे बॉयलरचे पाणी सोडले जाते त्या ठिकाणीची मासेमारी पूर्णतः नष्ट झाली आहे. या भागात मच्छीमारांना महाकूळ यासारखे मासे टनावर मिळत होते. मात्र, आता या समुद्र भागामध्ये माशांचे नामोनिशाण मिटले आहे. कंपनीने याकडे दुर्लक्ष करून मच्छीमारांचे मोठे नुकसान केले आहे. जिल्ह्यातील प्रशासकीय यंत्रणा ही कंपनीच्या बाजूने असल्याने कोणतीच उपाययोजना केली जात नाही.
नुकत्याच झालेल्या वायू गळतीमुळे विद्यार्थ्यांच्या जीवाशी प्रसंग बेतला होता. यातील काही विद्यार्थ्यांना कंपनीच्या ऊर्जा या आरोग्य केंद्रामध्ये भरती करण्यात आले होते. मात्र, या आरोग्य केंद्रात ऑक्सिजन व्यवस्थेबरोबर इतर कोणतेही सोयी सुविधा नसल्याने या विद्यार्थ्यांना रत्नागिरी येथील शासकीय रुग्णालयात हलवण्यात आले होते. जर, ऊर्जा केंद्रामध्ये आरोग्य विषयीच्या सोयी सुविधा उपलब्ध असती तर विद्यार्थ्यांवर तात्काळ उपचार झाले असते. या सगळ्याकडे कंपनीचे अधिकारी डोळेझाक करत आहेत.
शराफत गडबडे,
मच्छिमार, जयगड
जेएसडब्लू कंपनीतील वायुगतीच्या प्रकाराने नांदिवडे विद्यालयातील विद्यार्थ्यांना झालेला त्रासानंतर या प्रकारची चौकशी कंपनीच्या संबंधित यंत्रणेने केली आहे. या प्रकारात दोषी आढळणार्‍यांवर कारवाई करण्यात येईल. या प्रकारच्या चौकशीचा अहवाल आल्यावरच वायु गळतीमध्ये कोणता प्रकार घडला हे समजू शकेल.
सुदेश मोरे,
जेएसडब्लुचे संपर्क अधिकारी