कलोते ग्रामपंचायत अ‍ॅक्शन मोडवर

अनधिकृत वॉलकंपाऊड तोडणार

। पाताळगंगा । प्रतिनिधी ।

कलोते फाटा ते नडोदे रस्त्याच्या शेजारीच फार्महाऊसच्या मालकांनी अनधिकृत उंच दगडी वॉलकंपाऊड उभे केले आहेत. वाँलकंपाउंड रस्त्याच्या बाजूलाच असल्यामुळे नव्याने डांबरीकरण करताना रस्ता अरुंद राहिल्यामुळे नागरिकांना वाहतुक कोंडीच्या समस्येला तोंड द्यावे लागणार आहे. त्यामुळे नडोदे ग्रामपंचायतीने नाराजी व्यक्त केली आहे. बांधकाम विभागही जबाबदारी झटकत असल्यामुळे अखेर कलोते ग्रामपंचायत अ‍ॅक्शन मोडवर आली असून येत्या पंधरा दिवसात पोलिसांच्या मदतीने अनाधिकृत वाँलकंपाउड तोडणार असल्याचे स्पष्ट केले आहे.

मुंबई-पुणे जुन्या मार्गाला लागून कलोते फाट्यावरून नडोदेसह अन्य ग्रामीण गावांना जोडणारा मुख्य रस्ता असून या रस्त्यावरून दररोज असंख्य नागरिकांसह वाहनांची ये-जा असते. परंतु, या रस्त्याला लागूनच कलोते फाटा ते नडोदे मार्गावर मुंबईसह अन्य भागातील काही कंपन्यांसह फार्महाऊस आहेत. मात्र, काही मालकांनी कलोते फाटा ते नडोदे गावाला जोडणार्‍या रस्त्यावर खोदकाम करीत वॉलकंपाऊडचे अनधिकृतपणे बांधकाम केल्याने मार्ग अरुंद झाला आहे. त्यामुळे एकावेळी दोन मोठ्या वाहनांना रस्ता पार करताना मोठी कसरत करावी लागत असते. त्यामुळे अनधिकृत बांधकामाबाबत सर्वांमध्ये नाराजीचा सूड उमटत आहेत. याबाबत अनेकदा संबंधित ग्रामपंचायतीने फार्म हाऊस व कंपनी मालकांना पत्रव्यवहार करुन अनधिकृत बांधकाम हटवावे, अशी मागणी केली होती. परंतु, अनेकदा पत्रव्यवहार होऊनही आजवर या कंपनी व फॉर्महाऊस मालकांनी बांधकाम हटवले नसल्याचे चित्र पाहायला मिळत आहे. तर कलोतेफाटा ते नडोदे रस्त्याच्या डांबरीकरणासाठी कोट्यावधीचा निधी मिळाला असून डांबरीकरणाचे काम सध्या सुरू आहे. ठेकेदार अनाधिकृत वाँलकंपाऊडला अभय देत डांबरीकरण करीत असल्याने नागरिकांनी संताप व्यक्त केला आहे.

कलोते फाटा ते नडोदे गावापर्यंत रस्त्याचे नूतनीकरण होत आहे. हा रस्ता करताना रस्त्याच्या बाजूला बांधकामे पुढे आली आहेत, त्यामुळे रस्त्याचे रुंदीकरण करताना अडचणी येत आहेत. मात्र, हे पुढे आलेले बांधकाम हटविण्याचे अधिकार ग्रामपंचायतीला आहेत. त्यांनी हे काम करणे आपेक्षित आहे. मात्र, मंजूर झालेल्या नियमानुसार रस्त्याचे काम सुरू आहे.

निकिता गुरव,
कनिष्ठ अभियंता, महाराष्ट्र ग्रामीण रस्ते विकास

कलोते ग्रामपंचायत हद्दीतून जाणार्‍या कलोतेफाटा ते नडोदे रस्त्याच्या शेजारीच अनधिकृत वाँलकंपाऊड मालकांना बांधकाम तोडण्यासाठी नोटीस देणार आहोत. पंधरा दिवसात स्वतःहून वाँलकंपाऊड तोडले नाहीतर पोलिसांची मदत घेवून वाँलकंपाऊड तोडणार.

निलेश म्हसकर,
प्रशासक