Passport Scam: पासपोर्ट घोटाळ्याचा पर्दाफाश

बनावट शाळा सोडल्याचा दाखला सादर करून भारतीय नागरिकत्वाचा दावा

। खांदा कॉलनी । प्रतिनिधी ।

नवी मुंबईतील न्यू पनवेल परिसरात वास्तव्यास असलेल्या परदेशी नागरिक असलेल्या बहीण-भावाने स्वतःला भारतीय नागरिक म्हणून सादर करण्यासाठी मुंबईतील एका नामांकित शाळेच्या नावाने बनावट शाळा सोडल्याचा दाखला (School Leaving Certificate) तयार करून त्याचा पासपोर्ट अर्जासाठी वापर केल्याचा धक्कादायक प्रकार उघडकीस आला आहे. पासपोर्ट पडताळणी प्रक्रियेदरम्यान हा प्रकार समोर आल्यानंतर खांदेश्वर पोलीस ठाण्यात संबंधितांविरुद्ध गंभीर स्वरूपाचा गुन्हा दाखल करण्यात आला आहे.

पोलिसांनी दिलेल्या माहितीनुसार, संबंधितांनी भारतीय नागरिकत्वाचा दावा बळकट करण्यासाठी शैक्षणिक पुरावा म्हणून बनावट शाळा सोडल्याचा दाखला तयार करून तो पासपोर्ट अर्जासोबत सादर केला होता. पडताळणीदरम्यान खांदेश्वर पोलिसांनी शाळेच्या नोंदी, दाखल्यावरील माहिती आणि संबंधित कागदपत्रांची सखोल छाननी केली. त्यावेळी सादर करण्यात आलेले लिव्हिंग सर्टिफिकेट बनावट असल्याचे स्पष्ट झाले.

त्यानंतर पोलिसांनी तातडीने कारवाई करत संबंधितांविरुद्ध फसवणूक, बनावट कागदपत्र तयार करणे, बनावट दस्तऐवजांचा वापर करणे तसेच शासकीय यंत्रणेला चुकीची माहिती सादर करण्यासंदर्भातील कलमांनुसार गुन्हा नोंदविला आहे. याशिवाय पासपोर्ट अधिनियम, १९६७ मधील संबंधित तरतुदींनुसारही कारवाईची प्रक्रिया सुरू आहे.

दरम्यान, या बनावट कागदपत्रांच्या निर्मितीमागे कोणते एजंट किंवा रॅकेट कार्यरत आहे का, अशाच प्रकारे इतर अर्ज सादर करण्यात आले आहेत का, तसेच या प्रकरणात आणखी कोणाचा सहभाग आहे का, याचाही तपास खांदेश्वर पोलीस करीत आहेत.

खांदेश्वर पोलिसांच्या सतर्कतेमुळे हा प्रकार वेळेत उघडकीस आल्याने बनावट कागदपत्रांच्या आधारे पासपोर्ट मिळविण्याचा प्रयत्न हाणून पाडण्यात यश आले आहे. या कारवाईमुळे शासकीय कागदपत्रांच्या पडताळणीत कोणतीही तडजोड केली जाणार नसल्याचा स्पष्ट संदेश देण्यात आला आहे. तपासाच्या निष्कर्षानुसार पुढील कायदेशीर कारवाई करण्यात येणार असल्याचे पोलिसांनी सांगितले.