किड्स स्पोर्ट्स कार्निवल बोरीवलीत उत्साहात संपन्न

। मुंबई । वृत्तसंस्था ।

प्रज्ञा वर्धिनी फाऊंडेशन आणि मॅक्सज्ञान स्पोर्ट्स यांच्या संयुक्त विद्यमाने आयोजित करण्यात आलेल्या किड्स स्पोर्ट्स कार्निवल या आगळ्यावेगळ्या आंतरशालेय उपक्रमाला विद्यार्थी व पालकांचा छान प्रतिसाद मिळाला. सुविद्या स्पोर्ट्स अकॅडमी गोराई, बोरीवली (पश्‍चिम) या ठिकाणी या कार्निवलचे आयोजन करण्यात आले होते.

या वेळी माजी खासदार गोपाळ शेट्टी आणि वीरमाता अनुराधाताई गोरे यांनी उपस्थित राहून 15 शाळांमधून साडेआठशे पालक आणि मुलं यांना खेळाचे महत्व समजून सांगितले. अनुराधाताई गोरे आणि गोपाळ शेट्टी यांनी या वेळी आयोजकांचे, सर्व मुले, पालकांचे कौतुक करून खेळ आपल्याला शिस्तबद्धता आणि योग्य संयम शिकवतात, असे सांगितले. येणार्‍या काळामध्ये मुंबई उपनगरात स्पोर्ट्स हब बनविण्याचे उद्दिष्ट असल्याचे गोपाळ शेट्टी यांनी सांगितले. यावेळेस प्रज्ञावर्धिनी फाऊंडेशनच्या मॅनेजिंग ट्रस्टी अ‍ॅड. रूपाली ठाकूर, वैशाली भिडे बर्वे, महादेव गोविंद रानडे, सुविद्या प्रसारक संघाचे माजी अध्यक्ष डॉ. वसंत खटाव, विल्फ्रेड मेनेझेस, एमसीएचे क्रिकेट प्रशिक्षक नागेश ठाकूर आदी उपस्थित होते.