। पनवेल । प्रतिनिधी ।
सहा लाख रुपयांसाठी मित्राचा खुन करुन मृतदेहाची ओळख न पटण्यासाठी अंगावर पेट्रोल टाकून पसार होणार्या तीन आरोपींना पनवेल तालुका पोलिसांनी ताब्यात घेतले आहे.
टॉवरवाडी ते वांगणी-बदलापूर या पायवाटेपासून काही अंतरावर झाडीझुडूपात एका अनोळखी व्यक्तीचे प्रेत सापडल्याची माहिती स्थानिकांनी पोलिसांना दिली होती. त्यानूसार घटनास्थळी पाहणी करुन गुन्हा दाखल करण्यात आला होता.
या गुन्ह्याचा तपास पोलीस उपायुक्त गुन्हे परिमंडळ 2 शिवराज पाटील, सहाय्यक पोलीस आयुक्त भागवत सोनावणे, पनवेल विभाग सहाय्यक पोलीस आयुक्त, पोर्ट विभाग धनाजी क्षिरसागर यांच्या मार्गदर्शनाखाली करण्यात आला.
मृतदेहाची ओळख पटविण्यासाठी कोणताही पुरावा नसताना त्याची ओळख पटवून गुन्हा उघडकीस आणण्यासाठी वपोनि रवींद्र दौंडकर यांच्या मार्गदर्शनाखाली 5 पथकाची स्थापना केली. त्यामध्ये सपोनि संजय गळवे, सपोनि अविनाश पाळदे, सपोनि निलेश फुले, सपोनि विवेक भोईर, पोउपनि आकाश पवार व त्यांच्या सहकार्यांनी अधिक तपास केला.
गुन्ह्याचे गांभीर्य लक्षात घेवून सतत चार दिवस तांत्रिक तपास करून सपोनि संजय गळवे व पथकाने अत्यंत मेहनतीने घटनास्थळी ये-जा करणार्या रस्त्यांचे एकूण 15 ठिकाणांचे सीसीटीव्ही फुटेज तपासले संशयित इसमांची यादी तयार केली. अधिक तपास केला असता मयत इसम हा प्रवीण सुरेश शेलार असल्याचा अंदाज बांधण्यात आला. त्याच्या घरी विचारणा केली असता घरात वयोवृद्ध आई व भाऊ भेटले. चौकशीअंती ते दोघेही मनोरुग्ण असल्याचे निष्पन्न झाले.
पोलिसांनी त्यांच्याकडे प्रवीण शेलारबाबत विचारणा करून माहिती काढण्याचा प्रयत्न केला. परंतु प्रवीण कुठे आहे, याबाबत त्यांना माहिती नव्हती. मात्र पोलिसांनी प्रयत्नांची पराकाष्ठा करीत नरेश शांताराम बेटकर (42 रा.रत्नागिरी) यास उसर्ली बु. येथून ताब्यात घेतले व त्याची चौकशी केली असता त्याचे दोन मित्रांसोबत मिळून हा गुन्हा केल्याची कबुली दिली.
नेमके कारण काय?
आरोपी नरेश बेटकर व मयत प्रवीण शेलार हे मित्र होते. मयत प्रवीण शेलार हा अविवाहित असून विवाहासाठी तो मुलीच्या शोधात होता. त्याकरिता आरोपी बेटकर याने प्रवीणकडून 40 हजार रुपये घेतले होते. परंतु त्याने काम न केल्याने ती रक्कम मिळावी, याकरिता प्रवीणने नरेश बेटकर याच्याकडे तगादा लावला होता. रक्कम देणे शक्य नसल्याने तसेच त्याच्या घरातील मालमात्तेवरही कब्जा करण्याच्या हेतून नरेशने दोन साथीदारांच्या मदतीने प्रवीणचा खुन करण्याचे ठरविले. तसेच निर्जस्थळी नेत गळा आवळून खुन केला.
या तिन्ही आरोपींपैकी दिलीप शुक्ला (34) व अमनसिंग सिंह (25) यांना उत्तरप्रदेशमधून अटक केली आहे.