कृषीवल इम्पॅक्ट! मुरूडच्या रुग्णालयाची होणार दुरुस्ती

जिल्हा शल्यचिकित्सकांकडून दखल

| अलिबाग | प्रतिनिधी |

मुरूडमधील ग्रामीण रुग्णालयाच्या दुरावस्थेसह अपुऱ्या सुविधांबाबत मुरूडमधील शेकापचे पुरोगामी युवक तालुका उपाध्यक्ष मनिष माळी यांनी आवाज उठविला होता. कृषीवलने ही बाब बातमीच्या रुपात प्रशासनाच्या निदर्शनास आणून दिली. अखेर रुग्ण प्रशासन खडबडून जागे झाले. जिल्हा शल्यचिकित्सक यांनी प्रत्यक्ष भेट घेऊन दुरुस्ती करण्याची सुचना बांधकाम अधिकारी यांना दिल्या. त्यामुळे लवकरच मुरूडच्या रुग्णालयाची दुरुस्ती होणार आहे.

मुरूडमधील ग्रामीण रुग्णालयाच्या इमारतीचे बांधकाम 50 ते शंभर वर्षापुर्वी झाले आहे. दूरुस्ती अभावी या इमारतीमध्ये पावसाळ्यात छप्पर गळतीचा त्रास कायम आहे. त्याचा रुग्णांना नाहक त्रास होतो. रुग्णालयाच्या दोन्ही प्रवेशद्वारासमोर कॅटल ट्रॅपसह ड्रेनेज दूरुस्ती बांधकाम करणे. फतिमा बेगम रुग्णालयातील लिक्विड ऑक्सिजन प्लांटसाठी गेटसह शेड बांधकाम करणे. रुग्णालयाच्या दोन्ही आवारातील इमारतीमध्ये वाळवी प्रतिबंधात्मक उपचार करून पेस्ट कंट्रोल करणे. वैद्यकीय अधीक्षक यांच्या निवासस्थान आवारात पेव्हर ब्लॉक बसविणे. लॅबसाठी वॉश बेसिनसह ओटा बांधणे. अपघात विभाग रॅम्प ठिकाणी शेड बनविणे, कार्यालयाच्या दोन्ही मोठ्या दरवाजाच्या ठिकाणी पत्र्याचे शेड बांधणे. विद्युत जनरेटर शेड बनविण्याबरोबरच त्या शेडला बंधिस्त करणे. अधिपरिचारिका शासकीय वसाहत रुम अपूऱ्या असल्याने नवीन शासकीय वसाहत गृह बांधकाम करणे. नवीन शस्त्रक्रिया गृह बांधणे. याबाबत गेल्या अनेक महिन्यांपासून विशेष दूरूस्ती अंतर्गतनिधी मंजूर करण्याची मागणी ग्रामीण रुग्णालयाकडून करण्यात आली आहे.

रुग्णालयाच्या मागील बाजूस मुरूड नगरपरिषदेने नवीन गार्डनचे बांधकाम केले आहे. त्यामुळे पावसाचे पाणी जाण्याचा मार्ग पुर्णतः बंद झाला आहे. रुग्ण वाहिका शेड बसविण्याबरोबरच विद्यूत दूरुस्तीचे कामे करण्याची गरज निर्माण झाली आहे. अशा अनेक समस्यांनी मूरूडमधील ग्रामीण रुग्णालय ग्रासलेले आहे. वेगवेगळ्या दुरुस्तीसह बांधकाम करण्यासाठी गेल्या सहा महिन्यांपासून सार्वजनिक बांधकाम विभागाकडे मंजूरीसाठी प्रस्ताव पाठविण्यात आला आहे. मात्र, सार्वजनिक बांधकाम विभागाने त्याला मंजूरी अद्याप दिली नाही. त्यामुळे मुरूडमधील ग्रामीण रुग्णालयातील सेवेवर त्याचा विपरीत परिणाम होण्याबाबत शेकापचे मुरूडमधील पुरोगामी युवक उपाध्यक्ष मनिष माळी यांनी आवाज उठविला. याबाबत तात्काळ दखल घेऊन कार्यवाही करा अन्यथा आंदोलन छेडले जाईल, असा इशारा दिला होता. अखेर रुग्ण प्रशासन खडबडून जागे झाले. डॉ. निशिकांत पाटील यांनी मुरूडमध्ये जाऊन ग्रामीण रुग्णालयाची पाहणी केली. तेथील समस्या जाणून घेतल्या. सार्वजनिक बांधकाम विभागाचे उपअभियंता यांच्याशी चर्चा करून तात्काळ दुरुस्ती करण्याची सुचना केली. शेकाप आणि कृषीवलच्या दणक्याने मुरूडमधील रुग्णालयाची दुरुस्ती केली जाणार आहे.

रुग्णालयातील कर्मचारी, रुग्ण यांचे प्रचंड हाल होत आहेत. ग्रामीण रुग्णालयाच्या दुरावस्थेबाबत अनेक वेळा प्रशासनाकडे दाद मागितली. अपूऱ्या सुविधांमुळे गैरसोय होत आहे. परंतु, प्रशासन दुर्लक्ष करीत होते. कृषीवलने रुग्णालयातील प्रश्न बातमीच्या रुपात मांडला. अखेर प्रशासन जागे झाले. शल्यचिकित्सक यांनी रुग्णालयाला भेट देऊन पाहणी केली. दुरुस्ती करण्याबाबत सुविधा उपलब्ध करून देण्याचे आश्वासन दिले. सार्वजनिक बांधकाम विभागालादेखील त्यांनी दुरुस्ती करण्यासाठी सुचना केली.

मनीष माळी
उपाध्यक्ष
शेकाप मुरूड तालुका पुरोगामी युवक आघाडी