पनवेल पालिकेच्या तिजोरीत लाखोंची भर

लाखो मालमत्ताधारकांनी भरला तब्बल 483 कोटींची कर

| पनवेल | विशेष प्रतिनिधी |

पालिकेच्या मालमत्ता कर विभागाला यावर्षी कर वसुलीत उल्लेखनीय यश मिळाले आहे. 1 एप्रिल ते 29 ऑगस्ट 2025 या कालावधीत एकूण 1 लाख 36 हजार 967 मालमत्ताधारकांनी आपला मालमत्ता कर भरला असून, त्यातून तब्बल 483.08 कोटींची वसुली करण्यात आली असल्याची माहिती पालिकेकडून देण्यात आली आहे.

पालिकेकडून देण्यात आलेल्या माहितीनुसार, 18 जुलै ते 30 ऑगस्ट या कालावधीत ‌‘अभय योजने’अंतर्गत 78 हजार 45 करदात्यांनी मालमत्ता कर भरून 252.44 कोटींचे उत्पन्न महापालिकेला दिले आहे. मागील आर्थिक वर्षातील एकूण मालमत्ता करवसुली ही 424.78 कोटी झाली होती. त्या तुलनेत यावर्षी ऑगस्ट महिन्यातच 483.08 कोटींची विक्रमी वसुली करण्यात आली आहे. महापालिकेच्या या उच्चांकी वसुलीमुळे पनवेल महानगरपालिकेच्या विकासकामांना आर्थिक गती मिळणार आहे. नागरिकांनी आपला मालमत्ता कर लवकरात लवकर भरून महापालिकेस सहकार्य करावे, असे आवाहन महापालिकेच्यावतीने करण्यात आले आहे.

मालमत्ता कर विभागामार्फत करदात्यांना दिलासा देण्यासाठी ‌‘अभय योजना’ राबविण्यात येत आहे. नागरिकांच्या मागणीनुसार आयुक्त तथा प्रशासक मंगेश चितळे यांच्या सूचनेनुसार या योजनेत शास्ती माफीसाठी दिलेली मुदत वाढविण्यात आली आहे. दि.15 सप्टेंबरपर्यंत शास्तीवरती 90 टक्के सूट राहणार आहे. मालमत्ताधारकांना अभय योजनेचा लाभ घेण्याचे आवाहन महापालिकेच्या वतीने करण्यात आले आहे. तसेच दिनांक 31 ऑगस्टपर्यंत मालमत्ताधारकांनी मालमत्ता कर भरल्यास यावर्षीच्या मालमत्ता करावर 5 टक्के सूट मिळणार आहे. नागरिकांनी या संधीचा लाभ घ्यावा, असे आवाहन उपायुक्त स्वरूप खारगे यांनी केले आहे.
महापालिकेच्यावतीने करदात्यांना ई-बिल स्वीकारणे, डिजिटल पद्धतीने कर भरणे यासाठी प्रोत्साहित केले जात असून, असे केल्यास अतिरिक्त 2 टक्के सवलतीचा लाभ मिळू शकतो. तसेच ऊर्जा बचत, जल पुनर्भरण, कचरा व्यवस्थापन, पर्यावरणपूरक उपक्रम यामध्ये सहभाग घेणाऱ्या करदात्यांनादेखील 2 टक्के सवलतीची तरतूद करण्यात आली आहे.

कर-मित्र चॅटबॉटचे लोकार्पण
नागरिकांना अधिक सोयीस्कर, वेगवान आणि पारदर्शक सेवा देण्यासाठी पनवेल महानगरपालिकेने ‌‘कर-मित्र' चॅटबॉटचे नुकतेच लोकार्पण केले आहे. हा अत्याधुनिक चॅटबॉट मालमत्ता करदात्यांना घरबसल्या त्वरित माहिती, मार्गदर्शन आणि ऑनलाइन मदत पुरवेल.

पनवेल महानगरपालिकेच्या panvelmc.org या अधिकृत संकेतस्थळावर तसेच PMC Tax App आणि Panvel Connect App द्वारे ऑनलाइन कर भरता येणार आहे. या योजनेचा लाभ घेऊन प्रलंबित कर तात्काळ भरावा.

स्वरूप खारगे,
उपायुक्त