माथेरान घाटात बिबट्याचे दर्शन

टॅक्सी चालकाने केले मोबाईल मध्ये चित्रित; वन विभाग सतर्क

। नेरळ । प्रतिनिधी ।

माथेरान आणि पायथ्याशी असलेल्या वन क्षेत्रात वन्यजीवांचे वास्तव्य असल्याच आढळून आले आहे. मंगळवारी (दि.14) रात्री माथेरान घाट रस्त्याने प्रवास करणारा बिबट्या अनेकांचे नजरेस पडला. ह्या बिबट्याला टॅक्सी चालकाने आपल्या मोबाईल मध्ये चित्रित केल्याने बिबट्याचा वावर माथेरान जंगलात आहे हे पुन्हा सिद्ध झाले आहे. दरम्यान, बिबट्याच्या दर्शनाने वन विभागाने स्थानिक रहिवाशी यांना सतर्क राहावे अशी सूचना करण्यास फलकबाजी सुरू केली आहे.

माथेरानच्या डोंगरात सातत्याने बिबट्याचा वावर आढळून आला आहे. यावर्षी जानेवारी- फेब्रुवारी महिन्यात माथेरान डोंगरातील वाड्यांमध्ये बिबटे पोहचले होते. त्याचवेळी कुंभे आंबिवली भागात देखील त्यांचा वावर दिसून आला होता. त्यावेळी माथेरान -नेरळ आणि कर्जत पश्चिम वन विभागाच्या दुरशेत्र कार्यालय यांच्याकडून स्थानिक लोकांच्या गाव बैठका घेण्यात आल्या होत्या, त्यात सूचनांचा पाऊस पडला होता. मात्र, अनेकवेळा बिबट्याचे दर्शन तसेच वहिवाट दिसून आल्यानंतर त्या बिबट्यांकडून कोणताही धोका उद्भवला नव्हता. मागील एक महिन्यात कुठेही बिबट्याचा वावर दिसून आला नव्हता.

14 एप्रिल रात्री साडे सात वाजण्याच्या सुमारास माथेरान घाटात मुख्य रस्त्याने बिबट्याची धावपळ सुरू होती. त्यावेळी माथेरान येथील रहिवाशी असलेले टॅक्सी चालक महेंद्र जाबरे हे प्रवासी घेऊन नेरळ स्टेशनकडे येत होते. त्यावेळी गार्बेट रस्त्याच्या बाजूला ह्या बिबट्याचे दर्शन झाले आणि त्यावेळी गाडीच्या हेड लाईट मधून पुढे- पुढे जाणाऱ्या बिबट्याला आपल्या मोबाईल कॅमेऱ्यात कैद करता आले. पुढे हा बिबटा सिमेंट कठडा चढून गार्बेट वाडीकडे जाणाऱ्या रस्त्याच्या खाली उतरला. काही दिवस आधी एका पर्यटकाला त्यांच्या दुचाकी समोरून बिबट्याला रस्ता ओलांडता आढळून आला होता. ही घटना काही तासात जगभर पोहचली आहे.

वन विभागाने आज सकाळ पासून बिबट्याच्या अस्तित्वाचे पाऊलखुणा मिळतात का? हे पाहण्यासाठी माथेरान घाटात शोध मोहीम सुरू केली. तर स्थानिक टॅक्सी चालक यांना बिबट्याचा वावर दिसून आल्याने वन विभागाने खबरदारी म्हणून गावोगाव गावबैठका घेण्यास सुरुवात केली आहे. वन विभागाने बिबट्या दिसल्यानंतर काय करावे? याबाबत सूचना देणारे फलक देखील लावण्यास सुरुवात केली आहे. त्यात बिबट्याचे प्रवास ज्या बाजूने झाला तो भूभाग नेरळ- माथेरान वनक्षेत्रपाल यांच्याकडील तर बिबट्याने पुढे प्रवास ज्या गार्बेट गाडीकडे जाणाऱ्या रस्त्याने केला तो भूभाग कर्जत पश्चिम वनक्षेत्रपाल यांच्या कडील आहे. त्यामुळे दोन्ही दुरक्षेत्र विभागाचे अधिकारी यांनी जंगल परिसरात जाऊन पाहणी करण्यास सुरुवात केली आहे.