दिव्यांगाच्या जागेवर ‌‘लोना‌’चा डोळा?

शेतकऱ्यांच्या जागेत सांडपाण्याची वाहीनी टाकण्याचा घाट; जिल्हाधिकारी कार्यालयासमोर उपोषण सुरु

| रायगड | जिल्हा प्रतिनिधी |

कर्जत तालुक्यातील लाडीवली येथील एका दिव्यांग शेतकऱ्याच्या जागेतून लोना कंपनीने सांडपाणीची वाहीनी टाकल्याचा आरोप करण्यात आला आहे. त्यामुळे पिता पुत्रांनी न्यायासाठी अलिबागमधील जिल्हाधिकारी कार्यालयासमोर उपोषण सुरु केले आहे. या प्रकारामुळे दिव्यांगाच्या जागेवर लोना कंपनीचा डोळा असल्याचे बोलले जात आहे.

निवेदनातून मिळालेल्या माहितीनुसार, गणेश म्हामणकर असे या दिव्यांग शेतकऱ्याचे नाव आहे. हा शेतकरी दृष्टीहीन आहे. त्यांच्या लाडीवली येथील स. नं. 34/8 अ या जागेतून लोना इंडस्ट्रीज प्रा. लिमिटेड या कंपनीने सांडपाणी जाण्यासाठी वाहीनी टाकली. मात्र, शेतकऱ्यांना विश्वासात न घेता ही वाहीनी टाकल्याचा आरोप म्हामणकर यांनी केला आहे. याबाबत स्थानिक पातळीवर अनेक वेळा निवेदन देण्यात आले आहे. मात्र, कारवाई झालेली नाही. ते गेल्या पंधरा वर्षांपासून न्यायासाठी लढा देत आहेत. मात्र, संबंधित प्रशासनाकडून कागदी घोडे नाचवले जात आहेत. प्रत्यक्षात कोणताही ठोस कारवाई होत नसल्याचे त्यांच्याकडून सांगण्यात आले आहे. त्यामुळे संतप्त झालेल्या दिव्यांग व्यक्तीने अलिबागमधील जिल्हाधिकारी कार्यालयासमोर न्यायासाठी उपोषण सुरु केले आहे. यावेळी ही वाहीनी काढण्यात यावी, अशी मागणी गणेश म्हामणकर यांनी केली आहे.